Kókshetaýda súndettegen soń kóz jumǵan bala: Mınıstrlik jospardan tys tekserý júrgizedi
ASTANA. KAZINFORM – Densaýlyq saqtaý mınıstrligi Kazinform saýalyna joldaǵan jaýabynda Kókshetaýda súndettelgennen keıin qaıtys bolǵan balanyń isi qalaı júrip jatqany týraly málimet berdi.
«2024 jyldyń 5 aqpanynda Medıtsınalyq jáne farmatsevtıkalyq baqylaý komıtetiniń Aqmola oblysy boıynsha departamentine Kókshetaý qalasy polıtsııa basqarmasynan habar tústi. Ol habarda Aqmola oblystyq kópbeıindi balalar aýrýhanasynda kámeletke tolmaǵan balanyń súndettelgennen keıin kenet qaıtys bolǵany aıtylǵan» delingen jaýapta.
Vedomstvonyń dereginshe, qazirgi tańda osy oqıǵa negizinde sot-medıtsınalyq saraptama júrip jatyr. Sonyń qorytyndysy boıynsha atalmysh departament jospardan tys tekserý bastamaq.
«Tekserý qorytyndysy boıynsha zańnama aıasynda tıisti sharalar qabyldanady», — deıdi vedomstvodan.
