Kókshetaýda sýǵa kete jazdaǵan balany qutqarǵandarǵa qurmet kórsetildi
KÓKShETAÝ. QazAqparat - Aqmola oblysynyń ákimi Málik Myrzalın Kókshetaý qalasynda ózenniń muzy opyrylyp, sýǵa kete jazdaǵan balany qutqarǵandardy qabyldap, syı-qurmet kórsetti, dep habarlaıdy QazAqparat tilshisi.
Oblystyq ákimdikte ótken saltantty sharaǵa beıbit kúnniń batyrlary Temirlan Sháripbaev pen Jomart Mardýshev jáne olar qutqarǵan 8 jasar Danıılmen birge onyń anasy Tatıana Vladımırovna da qatysty. Anasynyń aıtýynsha, balasy Kókshetaýdaǵy №4 orta mekteptiń 3-shi synybynda oqıdy. Balasynyń sýǵa batyp kete jazdaǵanyn tek úıine jetkizgen kezde ǵana bilgen. Al, Danııl ózi sııaqty balalarmen Qylshaqty ózenniń jaǵasynda oınap júrgen edi. Ol muzdyń ústine qalaı shyǵyp ketkenin bilmeıdi. Muzdyń qalyndyǵyn teksermek boldym deıdi ózi. Sýǵa kete jazdaǵan balanyń shyryldaǵan daýysyn sol mańnan ótip bara jatqan beıtanys adamdar estip qalǵan. Sonyń biri Kókshetaýdaǵy azamattyq qorǵanys kolledjiniń oqýshysy Temirlan Sháripbaev jaǵada balany qutqarýǵa árekettenip jatqan adamdardy kórip, oılanbastan sýǵa qoıyp ketip, balany alyp shyǵýǵa tyrysady. Muz qalyń, ári sý sýyq bolǵandyqtan balaǵa jetý ońaı bolmapty. Sol sátte oǵan Jomart Mardýshev degen taǵy bir jigit kómekke kelip, ekeýlep balany shyǵaryp alady.
«Men kópirdiń ústimen úıge bara jatyp tómende adamdardy jáne aıqaılap jatqan balany baıqap qaldym. Sonda júgirip bardym. Bala 8-9 jas shamasynda, ol sýdyń aǵysymen ári qaraı ketip bara jatty. Men birden kóp oılanbastan muzdy jaryp, ony qutqarýǵa umtyldym. Bireýler arqan laqtyryp jatty, biraq odan nátıje bolmady. Sol sátte taǵy bir er adam kómekke kelip, ekeýimiz birlesip balany jaǵaǵa alyp shyqtyq. Keıin bir apaı meni kolledjdiń jataqhanasyna deıin jetkizip tastady. Onda meni komendant kútip alyp, jyly kıim men sháı berdi», -deıdi Temirlan.
Aımaq basshysy Danııl men ony qutqarǵan Temirlan Sháripbaev pen Jomart Mardýshevten oqıǵanyń qalaı bolǵanyn óz aýyzdarynan estı kele, oqys oqıǵa kezinde erlik tanytqandarǵa alǵysyn aıtyp, baǵaly syılyqtar tartý etti. Sonymen qatar, balaǵa budan bylaı ata-anasynyń baqylaýynsyz ózenge, kólderge barmaýyna keńesi berdi.
«Búgingi kúni qoǵamda mundaı azamattar kezdese bermeıdi. Olardyń erlikke para-par áreketi men jedel qımylynyń arqasynda ǵana jas bala aman qaldy», - dedi aımaq basshysy.
Sonymen qatar, oblys ákimi tótenshe jaǵdaılar departamentiniń ókilderine balany qutqarǵan azamattardy vedomstvolyq marapatqa usyný qatettigin atap ótti.
