Kókshetaýda sý tasqynynan zardap shekkenderdiń shyǵyndary óteledi
KÓKShETAÝ. QazAqparat - Kókshetaýda sý tasqynynan zardap shekkenderdiń shyǵyndary óteledi, dep habarlaıdy QazAqparat tilshisi Aqmola oblysynyń ishki saıasat basqarmasyna silteme jasap.
Vedomstvonyń málimeti boıynsha, qazirgi tańda óńirde kóktemgi sý tasqynynyń aldyn alý jáne zardaptaryn joıý jumystary qarqyndy júrip jatyr. Jergilikti atqarýshy organdar men oblystyq TJD bólimsheleriniń kúshteri jáne quraldarynyń kómegimen eldi mekenderdegi turǵyn úıler men nysandardy sýdan qorǵaý boıynsha keshendi sharalar qolǵa alynǵan.
Kókshetaý qalasynda sý basqan úılerdiń jertóleleri men aýlalary sýdan sorǵytylyp jatyr. Qalanyń kommýnaldyq qyzmetteri men jastar resýrstyq ortalyǵynyń eriktileri turǵyn úı oramdaryn abattandyrýda.
Qala ákimdigindegiler sý tasqynynan materıaldyq zardap shekkenderge bir rettik qarjylaı kómek kórsetiletin atap ótti. Tabıǵattyń tosyn minezinen keltirilgen shyǵyn kólemi eseptelgen soń ótemaqy tólenedi.
Qala ákimi Amangeldi Smaıylov zardap shekken otbasylarmen kezdesip, qıyn sátte kómek kórsetýge ýáde etti.
Aldaǵy ýaqytta sý basqan aýmaqtardaǵy jer telimderin satyp alyp, memlekettik baǵdarlama boıynsha kópqabatty turǵyn úı salý jáne jol tartý josparda bar.
Aqmola oblysynyń TJD deregi boıynsha, óńirdiń Kókshetaý, Stepnogorsk qalalary men Birjan sal, Ereımentaý, Shortandy, Aqkól, Býrabaı, Bulandy, Egindikól aýdandarynda jaǵdaı turaqtandy.
«Tselınograd, Astrahan, Zerendi, Arshaly jáne Atbasar aýdandarynda TJD men jergilikti atqarýshy organdardyń kúshterimen 4 myń tekshe metrden astam sý sorǵytylyp, ınerttik materıaldar men qum tóselýde», - dep atap ótti jýrnalıstermen ótken brıfıngte Aqmola oblystyq TJD bastyǵy Alekseı Sovetov.
