Kókshetaýda sý tasqynynan zardap shekkenderden alǵashqy otbasy baspanaly boldy
KÓKShETAÝ. KAZINFORM – Kókshetaý qalasynda sý tasqynynan zardap shekken eki otbasyna páter kilti tapsyryldy.
Aqmola oblysy ákimi baspasóz qyzmetiniń málimetinshe, páter kiltterin aımaq basshysy Marat Ahmetjanov tabys etti. Ol óz sózinde memleket tarapynan sý tasqyny kezinde keltirilgen zalaldy azaıtý úshin barlyq shara qoldanylyp jatqanyn atap ótti.
«Memleket basshysynyń tapsyrmasy boıynsha Aqmola oblysynda azamattardyń qaýipsizdigin qamtamasyz etý jáne olardyń qajettilikterin sheshý boıynsha úlken jumys júrgizilip jatyr. Búgingi tańda sý tasqynynan zardap shekkenderdiń arasynda sizder alǵashqylardyń biri bolyp baspanaly bolyp otyrsyzdar. Otbasylaryńyzdyń qýanyshy uzaǵynan bolyp, bar qıynshylyqtar artta qalsyn», - dedi quttyqtaý sózinde Marat Ahmetjanov.
Memlekettik qordyń esebinen kópbalaly Qaparovtar men Nıkýlınder otbasy baspanaly bolyp otyr. Olar bul páterlerdi ózderi tańdaǵan, onda qajetiniń bári bar.
«Prezıdentke bizdiń máselelerimizdi tez sheshkeni úshin alǵys aıtamyz. Bizdiń otbasymyz úshin bul úlken qýanysh, balalar rıza, barlyǵyna úlken raqmet. Biz óz tarapymyzdan osy úıde tek qýanyshty sátter bolýyna tyrysamyz», - dedi Sáýle Qaparova.
Ákimdikten atap ótkendeı, Memleket basshysynyń tapsyrmasy aıasynda Aqmola oblysynda zardap shekkenderge barlyq qajetti qoldaý kórsetý jáne azamattardyń múlkin qalpyna keltirý boıynsha jumystar júrgizilip jatyr.
Óńirde shyǵyndardy óteý jáne joıý jónindegi jumys turǵyn úı qatynastary týraly qoldanystaǵy zańnama sheńberinde jalǵasa bermek. Búgingi kúnge deıin oblys ortalyǵynda 174 otbasy 65 mln teńgeden astam somaǵa birjolǵy tólem aldy. Sondaı-aq, materıaldyq shyǵyndardy baǵalaý jáne óteý jónindegi komıssııa 12 otbasyna 8 mln teńgeden astam kólemde materıaldyq zalaldy óteý týraly sheshim shyǵardy.
Buǵan qosa, turǵyn úılerdiń odan ári turýǵa jaramdylyǵyn anyqtaý boıynsha tehnıkalyq tekseris qolǵa alynǵan.
Aıta ketsek, budan buryn Kókshetaýda sý tasqynynan múlkine zııan kelgen 65 adamnan ótinish túskenin jazǵan edik.
