Kókshetaýda sý tasqynynan múlkine zııan kelgen 65 adamnan ótinish tústi

KÓKShETAÝ. KAZINFORM – Kókshetaýda sý tasqynynan qala turǵyndarynyń múlkine keltirilgen shyǵyndy esepteý komıssııasy jumysyn bastady. Sońǵy málimet boıynsha 65 adamnan ótinish túsken.

Bıylǵy jylǵy naýryzdyń 29-da erigen qar sýynyń saldarynan Qylshaqty ózeni arnasynan asyp, Kókshetaý qalasyndaǵy birqatar turǵyn úıler men aýlalardy, áleýmettik nysandardy sý basyp qaldy. Osyǵan baılanysty qala basshysy Baýyrjan Ǵaısanyń sheshimimen oblys ortalyǵy aýmaǵynda jergilikti aýqymdaǵy tabıǵı sıpattaǵy tótenshe jaǵdaı jarııalaý týraly №13 sheshim qabyldandy.

Kókshetaý qalasyndaǵy tótenshe jaǵdaı saldarynan zardap shekkenderge keltirilgen zııandy (zalaldy) óteý úshin ótinishter Shalqar 9A mekenjaıy boıynsha ornalasqan Kókshetaý qalasynyń jumyspen qamtý, áleýmettik baǵdarlamalar jáne azamattyq hal aktilerin tirkeý bóliminde tirkeledi. Jedel qabyldaý jáne azamattardyń kezekte turyp qalmaýy úshin bólimde 5 tereze arqyly ótinishter qabyldanady.

«Ótinishterdi qabyldaý bıylǵy jyldyń 2 sáýirinde bastaldy. Búgingi tańda qala turǵyndarynan barlyǵy 65 ótinish tústi», - delingen qala ákimdiginiń málimetinde.

Buǵan qosa, Kókshetaý qalasy ákimdigi janyndaǵy materıaldyq nuqsandy baǵalaý jáne óteý jónindegi komıssııa quryldy. Ótinishter túskennen kúnnen bastap, on kún merzim ishinde qaralatyn bolady.

Aıta ketsek, budan buryn Kókshetaýda sý tasqynyna baılanysty Tótenshe jaǵdaı jarııalanǵanyn jazǵan edik.