Kókshetaýda sý qubyry jarylyp, 20 turǵyn úı sýdan ajyratyldy
«Kókshetaý sý arnasy» kommýnaldyq kásipornynyń málimeti boıynsha, tótenshe jaǵdaı búgin tańerteń Aqan seri kóshesiniń boıyndaǵy 116 turǵyn úıdiń tusynda bolǵan.
«Osy jerde dıametri 300 mm magıstral sý qubyry jaryldy. Osyǵan baılanysty Nazarbaev dańǵyly men Aqan seri kósheleriniń qılysatyn tusy jabylyp, kólik qozǵalysyna ýaqytsha shekteý qoıyldy. Apatty joıý úshin keshki saǵat 20:00-ge deıin 20 turǵyn úıdi aýyz sýdan ajyratýǵa týra keldi. Turǵyndarǵa sý kúni boıy tasymaldanyp jetkiziledi», dep túsindirdi QazAqparat tilshisiniń saýalyna «Kókshetaý sý arnasy» kommýnaldyq kásipornynyń dıspetcherleri.
Aıta keteıik, 2020 jyldyń 1 qańtarynda Kókshetaý qalasyndaǵy Sh.Ýálıhanov kóshesi 177 úıdiń janynda sý qubyry jarylǵan bolatyn. Al, aqpannyń 1-de Kókshetaýǵa qarasty Krasnoıar kentinde dıametri 150 mm sý qubyry magıstraly jarylyp, turǵyndarǵa sý tasymaldanyp jetkizilgen edi.
