Kókshetaýda sý berý toqtatyldy
KÓKShETAÝ. QazAqparat – Kókshetaý qalasy boıynsha sý berý ýaqytsha toqtatyldy. Bul týraly qalalyq «Kókshetaý sý arnasy» kommýnaldyq kásiporny áleýmettik jelidegi paraqshasynda jarııalady, dep habarlaıdy QazAqparat tilshisi.
Jelidegi jazbada kórsetilgendeı, aqpannyń 24-inde Beıbitshilik (Mır) kóshesiniń boıynda dıametri 800 mıllımetrli KNS 2 qubyry jaryldy. Uzaq ýaqyt kárizdik kollektorlardy paıdalanǵandyqtan qubyr maıysqan.
«Osyǵan baılanysty aqpannyń 24-i keshki saǵat 20:00-de bastap, 25-i aqpan saǵat 14:00-ge deıin qala boıynsha sý berý ýaqytsha toqtatylady. Qazirgi kezde «Kókshetaý sý arnasy» kommýnaldyq kásipornynyń mamandary qalpyna keltirý jumystaryn júrgizýde. Ýaqytsha týyndaǵan qolaısyzdyqqa baılanysty keshirim suraımyz», - dep jazylǵan «Kókshetaý sý arnasy» kommýnaldyq kásipornynyń áleýmettik jelidegi paraqshasynda.
