Kókshetaýda sý basqan úılerdiń turǵyndaryn qutqarýshylar qaıyqpen jáne jaıaý arqalap shyǵaryp jatyr
KÓKShETAÝ. KAZINFORM - Kókshetaý qalasynda Qylshaqty ózeniniń arnasynan asyp ketýine baılanysty 8 jeke úıdi sý basty, sondaı-aq, 28 jeke úıdiń jáne 7 kópqabatty turǵyn úıdiń aýlasy sý astynda qaldy.
Aqmola oblysy TJD baspasóz qyzmetiniń málimetinshe, qazirgi ýaqytta Qylshaqty ózeniniń jaǵalaýyn nyǵaıtý jumystary júrgizilip jatyr, ıaǵnı 280 tonna ınertti materıal tóselip, 150 m jaǵalaý nyǵaıtyldy. Sonymen birge 110 m kanal men aryqtar keńeıtilip, tereńdetildi. Nysandardyń aınalasyna qum salynǵan 310 qap tóseldi, 1000 astam tekshe metr sý soryldy.
Sý basý qaýpi bar ýchaskelerinde polıtsııa jáne jergilikti atqarýshy organdardyń qyzmetkerlerinen kezekshilik uıymdastyryldy. Sý tasqynymen kúresý úshin TJD jeke quramnyń 59 adam jáne 4 birlik tehnıka, 9 motopompa, azamattyq qorǵaý akademııasynan 63 adam, 2 birlik tehnıka, PD jeke quramnan 7 adam jáne 7 birlik tehnıka, JAO 126 adam, 64 birlik tehnıka, 10 birlik motopompa jumyldyryldy. Bul baǵyttaǵy jumystar jalǵasyp jatyr.
Aıta ketsek, budan buryn Kókshetaýda Qylshaqty ózeni arnasynan asyp, temirjol vokzaly mańyn sý basqanyn jazǵan edik.
