Kókshetaýda sottyń taǵy bir qyzmetkeriniń máıiti tabyldy
ASTANA. KAZINFORM — Aqmola oblysynyń polıtseıleri taǵy da «Ózin-ózi óltirýge deıin jetkizý» baby boıynsha qylmystyq is qozǵady.
Kókshetaýda sottyń taǵy bir qyzmetkeriniń kóz jumǵany belgili boldy.
Aqmola oblystyq polıtsııa departamentiniń baspasóz qyzmeti oqıǵany rastady. Vedomstvonyń málimetinshe, 30 qazanda Kókshetaý qalasynan er adamnyń máıiti tabylǵan.
— Aldyn ala málimet boıynsha, marqum ózine qol jumsaǵan. Qylmystyq is tirkeldi. Qazir oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr. Qazaqstan Respýblıkasy Qylmystyq-protsestik kodeksiniń 201-babyna sáıkes, ózge aqparat jarııa etýge jatpaıdy, — dep habarlady vedomstvodan.
Marqum Aqmola oblystyq sotynyń ishki qaýipsizdik bóliminde bas maman bolyp jumys istegen.
Eske salaıyq, 17 qyrkúıekte polıtsııa Kókshetaý qalalyq soty ákimshiliginiń 27 jastaǵy basshysy Aıan Dúısekovtiń ólimine baılanysty qylmystyq is qozǵaǵan edi. Marqumnyń týystary oqıǵanyń barlyq mán-jaıyn jan-jaqty ári obektıvti tekserýdi talap etti. Otbasynyń málimetinshe, Aıanǵa únemi moraldyq jáne psıhologııalyq qysym kórsetilgen.
Bul — Kókshetaýda sot qyzmetkeriniń qaza bolýyna qatysty ekinshi jaǵdaı.
Sol kezde Aqmola oblysy boıynsha QR Sot ákimshiligi departamenti Kókshetaý qalalyq soty ákimshisiniń basshysy Aıan Dúısekovtiń ólimine jumystaǵy qysym, tártiptik jaza nemese qyzmettik baspana máselesi sebep bolýy múmkin degen boljamdardy joqqa shyǵarǵan edi.
