Kókshetaýda sot qyzmetkeri qaza tapty: Sot ákimshiligi túsinikteme berdi
ASTANA. KAZINFORM — Aqmola oblysy boıynsha QR Sot ákimshiligi departamenti Kókshetaý qalalyq soty ákimshiliginiń basshysy Aıan Dúısekovtiń qazasyna oǵan jumys ornynda qysym jasaý, tártiptik jaza nemese qyzmettik baspana máselesi sebep bolýy múmkin degen boljamdardy joqqa shyǵardy.
Vedomstvo sondaı-aq marqumnyń týystary buǵan deıin aıtqan ýájderdi joqqa shyǵardy.
— Aıan Dúısekovke qyzmetine baılanysty qandaı da bir qysym kórsetilgen joq. Ol jumys istegen búkil kezeńde onymen qarym-qatynas iskerlik sıpatta bolyp, ádep normalary saqtaldy. Eńbek qatynastary aıasynda qabyldanǵan barlyq sheshim tek qyzmettik jaǵdaılarǵa baılanysty jáne belgilengen tártippen júzege asyryldy, — dep atap ótti departament.
Vedomstvo 13 tamyzda Aıan Dúısekovke sógis túrindegi tártiptik jaza qoldanylǵanyn rastady. Departamenttiń málimetinshe, sheshim eńbek tártibin buzǵany úshin jáne tıisti negizder bolǵan jaǵdaıda belgilengen tártippen qabyldanǵan.
— Tártiptik jazanyń qoldanylýy tek qyzmettik jaǵdaılarǵa baılanysty boldy jáne qyzmetkerge degen jeke kózqaras nemese qysym kórsetý áreketi bolǵan joq, — dep málimdedi vedomstvo.
Aıan Dúısekovti tártiptik jaýapkershilikke tartýǵa qatysty materıaldardy QR Memlekettik qyzmet isteri agenttiginiń aýmaqtyq ýákiletti organy da tıisti ótinishti qaraý barysynda zerttegen. Tekserý nátıjesinde tártiptik jaýapkershilikke tartý tártibiniń buzylǵany anyqtalmaǵan.
Departament qyzmettik baspanaǵa qatysty aqparatqa da túsinikteme berdi.
— Aıan Dúısekovti ózi turyp jatqan qyzmettik turǵyn úıden shyǵarý máselesi kóterilgen de, qaralǵan da joq. Sebebi bul turǵyn úıdi sýdıany ornalastyrý úshin paıdalaný qajettiligi bolmaǵan. Osyǵan baılanysty ony turǵyn úıden shyǵarý týraly eshqandaı sheshim qabyldanǵan joq, — dep habarlady vedomstvo.
Departament tergeý jumystaryna qajetti kómek kórsetip, suratylǵan aqparat pen materıaldardy usynyp jatqanyn atap ótti.
— Tergeý barysynda bolǵan oqıǵanyń barlyq mán-jaıy jan-jaqty zerttelip jatyr. Onyń ishinde Aıan Dúısekovtiń qyzmetine jáne jeke ómirine qatysty, qaıǵyly jaǵdaıǵa áser etýi múmkin faktorlar da qarastyrylýda. Oqıǵanyń sebepteri men mán-jaıyna qatysty túpkilikti qorytyndy tek tergeý nátıjesinde jasalady, — dedi vedomstvo.
Sondaı-aq departament tergeý aıaqtalǵanǵa deıin anyqtalǵan faktilerdi túrli boljamdar men nusqalarmen almastyrmaýǵa shaqyrdy.
Buǵan deıin Kókshetaý qalalyq soty ákimshiligi basshysynyń ólimi boıynsha qylmystyq is qozǵalǵany týraly jazdyq. Marqumnyń týystary bolǵan oqıǵanyń barlyq mán-jaıyn jan-jaqty ári obektıvti tekserýdi talap etip otyr.
