Kókshetaýda sot qyzmetkeri Aıan Dúısekovtiń ólimine qatysty is toqtatyldy
KÓKShETAÝ. KAZINFORM — Kókshetaýda sot qyzmetkeri Aıan Dúısekovtiń qazasyna baılanysty qozǵalǵan qylmystyq is toqtatyldy. Al sottyń ekinshi qyzmetkeriniń ólimine qatysty tergeý áli jalǵasyp jatyr. Bul týraly Kazinform agenttiginiń tilshisi habarlady.
Aqmola oblystyq polıtsııa departamentiniń baspasóz qyzmetiniń málimetinshe, 13 qyrkúıekte sýıtsıd deregi boıynsha sotqa deıingi tergeý bastalǵan.
— Tergeý barysynda qajetti is-sharalar júrgizilip, tıisti materıaldar jınaldy. Tergeý nátıjesinde qylmystyq quqyq buzýshylyq quramynyń bolmaýyna baılanysty is toqtatyldy, – dep habarlady vedomstvodan.
Polıtsııa departamentiniń naqtylaýynsha, sottyń ekinshi qyzmetkeriniń ólimine qatysty qylmystyq is áli de óndiriste.
Eske salaıyq, buǵan deıin Kókshetaý qalalyq soty ákimshisiniń 27 jastaǵy basshysy Aıan Dúısekovtiń ólimine baılanysty polıtsııa qylmystyq is qozǵaǵan bolatyn. Marqumnyń týystary oqıǵanyń barlyq mán-jaıyn jan-jaqty ári obektıvti tekserýdi talap etken edi.
Otbasynyń málimetinshe, Aıanǵa únemi moraldyq jáne psıhologııalyq qysym kórsetilgen.
Al Aqmola oblysy boıynsha QR Sot ákimshiligi departamenti sot ákimshisiniń basshysy Aıan Dúısekovtiń ólimine onyń jumys ornyndaǵy qysym, tártiptik jaza nemese qyzmettik baspana máselesi sebep bolýy múmkin degen boljamdardy joqqa shyǵarǵan bolatyn.
Arada bir aıdan sál astam ýaqyt ótkende sottyń taǵy bir qyzmetkeriniń máıiti tabyldy. Ol – Aqmola oblystyq sotynyń ishki qaýipsizdik bóliminiń bas mamany.
Keıin anyqtalǵandaı, birinshi jáne ekinshi marqum dos bolǵan. Osy oqıǵadan keıin óńir polıtsııasy Qylmystyq kodekstiń «Ózin-ózi óltirýge deıin jetkizý» baby boıynsha taǵy da qylmystyq is qozǵaǵan.
Eske salaıyq, 17 qyrkúıekte polıtsııa Kókshetaý qalalyq soty ákimshiliginiń 27 jastaǵy basshysy Aıan Dúısekovtiń ólimine baılanysty qylmystyq is qozǵaǵan edi. Marqumnyń týystary oqıǵanyń barlyq mán-jaıyn jan-jaqty ári obektıvti tekserýdi talap etti. Otbasynyń málimetinshe, Aıanǵa únemi moraldyq jáne psıhologııalyq qysym kórsetilgen.
Bul — Kókshetaýda sot qyzmetkeriniń qaza bolýyna qatysty ekinshi jaǵdaı.
Sol kezde Aqmola oblysy boıynsha QR Sot ákimshiligi departamenti Kókshetaý qalalyq soty ákimshisiniń basshysy Aıan Dúısekovtiń ólimine jumystaǵy qysym, tártiptik jaza nemese qyzmettik baspana máselesi sebep bolýy múmkin degen boljamdardy joqqa shyǵarǵan edi.
