Kókshetaýda sıntetıkalyq esirtki jasyrǵan adam ustaldy

KÓKShETAÝ. QazAqparat - Kókshetaýda sıntetıkalyq esirtki jasyrǵan adam ustaldy. Polıtsııa qyzmetkerleri tintý kezinde kúdiktiden polıetılen paketke salynǵan 30 býma mefedron tárkiledi, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

Vedomstvonyń málimetinshe, 37 jastaǵy kúdikti 23 maýsymda «Qarasora – 2023» jedel aldyn alý is-sharasy barysynda qolǵa túsken.

«Tintý kezinde kúdiktiden polıetılen paketke salynǵan 30 býma mefedron tárkilendi. Alynǵan zattyń naqty quramy men salmaǵyn saraptama anyqtaıdy. Belgili bolǵandaı, kúdikti biraz ýaqyttan beri Kókshetaý qalasynyń aýmaǵynda sıntetıkalyq esirtki zatyn taratýmen aınalysqan jáne ustalǵan kúni de sol zańsyz kásibin júzege asyrýǵa tyrysqan», - dedi vedomstvodan.

PD baspasóz qyzmetinen atap ótkendeı, osy derek boıynsha Qylmystyq kodekstiń 264-babynyń 4-bóligi boıynsha sotqa deıingi tergeý amaldary qolǵa alyndy. Kúdiktiniń qylmysy dáleldense, onda ol úsh jyldan bastap jeti jylǵa deıin bas bostandyǵynan aıyrylýy múmkin.

Aıta ketsek, budan buryn Kókshetaýda qoǵam belsendisi esirtki saqtady degen kúdikpen ustalǵanyn jazǵan edik.