Kókshetaýda Shoqan Ýálıhanovtyń 190 jyldyǵyna arnalǵan forým ótti
ASTANA. KAZINFORM – Kókshetaý qalasynda Almaty Menedjment ýnıversıtetiniń (AlmaU) bastamasymen jáne Ualikhanov University, QR Ulttyq ǵylym akademııasy, sondaı-aq QR Ulttyq mýzeıimen birlese uıymdastyrylǵan «Shoqan Ýálıhanov: zertteýshi, aǵartýshy, dáýir tulǵasy» atty halyqaralyq ǵylymı forým ótti. Bul týraly Ǵylym jáne joǵary bilim mınıstrligi habarlady.
Forým ult rýhanııaty men ǵylymnyń toǵysqan taǵylymdy alańyna aınalyp, qazaq halqynyń asa kórnekti ǵalymy, etnografy, folklortanýshysy jáne aǵartýshysy Shoqan Shyńǵysuly Ýálıhanovtyń 190 jyldyq mereıtoıyna arnaldy.
Іs-sharanyń negizgi maqsaty Shoqan Ýálıhanovtyń otandyq jáne álemdik ǵylymǵa qosqan úlesin jańa qyrynan zerdeleý, onyń ıdeıalary men zertteý ádisteriniń qazirgi gýmanıtarlyq jáne áleýmettik ǵylymdardaǵy ózektiligin talqylaý, sondaı-aq jas zertteýshilerge shabyt berip, ǵylymı izdeniske serpin berý boldy.
Forýmnyń ashylý saltanatyna QR Ulttyq ǵylym akademııasynyń prezıdenti Aqylbek Kúrishbaev, AlmaU rektory Asylbek Qojahmetov, Aqmola oblysy ákiminiń orynbasary Dosulan Aıtbaev, Ualikhanov University rektory Marat Syrlybaev jáne QR UǴA akademıgi Orazaq Ismaǵulov qatysty.
Forým aıasynda Shoqan Ýálıhanovtyń ómiri men ǵylymı eńbekterine arnalǵan kórme uıymdastyryldy. Іs-sharanyń mańyzdy bóligi retinde belgili zertteýshi Ismaıljan Imınovtyń «Jeti qala ólkesinde» atty kitabynyń tusaýkeseri ótti. Sonymen qatar ǵalymdar men sarapshylar pikir almasqan paneldik sessııalar men pikirtalas alańdary jumys istedi.
Forým barysynda AlmaU jáne Turan TV birlesip ázirlegen «Shoqan Ýálıhanovtyń izimen» atty derekti fılm kórsetilip, ǵalymnyń ekspedıtsııalary men zertteýleriniń tarıhı mańyzy keńinen talqylandy. Іs-shara aıasynda Shoqan Ýálıhanovtyń tulǵasy men ǵylymı murasy jańa qyrynan ashylyp, otandyq jáne sheteldik zertteýshiler arasynda mazmundy pikir almasý órbidi. Sondaı-aq jas ǵalymdarǵa jańa ıdeıalar men ǵylymı yntymaqtastyqqa jol ashatyn shabyt kózine aınaldy.
Aıta keteıik, Bishkekte Shoqan Ýálıhanov týraly derekti fılmniń tusaýkeseri ótti.