Kókshetaýda Seıfýllınge arnalǵan memorıaldyq taqta ashyldy
KÓKShETAÝ. QazAqparat - Kókshetaýda Aqmola oblystyq «Arqa ajary» gazetiniń 100 jyldyǵyna oraı Səken Seıfýllınge arnalǵan memorıaldyq taqta ashyldy, dep habarlaıdy QazAqparat tilshisi.
Saltanatty shara Abylaıhan eskertkishine gúl shoǵyn qoıýdan bastaldy. Buǵan Aqmola oblysy ákiminiń orynbasary Aına Mysyrálimova, «Egemen Qazaqstan» respýblıkalyq gazeti» AQ basqarma tóraǵasynyń orynbasary Erbolat Qamenov, Sáken Seıfýllın mýzeıiniń dırektory, aqyn, QR Memlekettik syılyǵynyń jáne «Alash» syılyǵynyń laýreaty Nesipbek Aıtuly, QR Parlamenti Májilisiniń besinshi shaqyrylymnyń depýtaty, jýrnalıst, QR Memlekettik syılyǵynyń laýreaty Aldan Smaıyl, Memleket tarıhy ınstıtýty dırektorynyń orynbasary, professor Amangeldi Smaıylov, «Jetisý» gazetiniń bas redaktory Ámire Aryn qatysty.
Budan keıin qazirgi «Arqa ajary» gazeti redaktsııasy ǵımaratynyń syrtyna osy gazettiń negizin qalaǵan qazaqtyń ataqty aqyny, jalyndy jazýshysy, daryndy dramatýrg, bilikti ustaz, memlekettik qaıratkeri, Qazaqstannyń qazaq ádebıetiniń negizin qalaýshylardyń biri Səken Seıfýllınniń qurmetine memorıaldyq taqta ashyldy.
Jınalǵandar aldynda quttyqtaý sóz sóılegen Aqmola oblystyq ishki saıasat basqarmasynyń basshysy Aına Mysyrálimova Sáken Seıfýllınniń qaıratkerligine toqtala kele, ony atsalysýymen ashylǵan «Tirshilik» gazetiniń izin jalǵap kele jatqan júz jyldyq tarıhy bar búgingi «Arqa ajarynyń» redaktsııasy ujymynyń el ıgiligi jolyndaǵy sharalardy tıimdi nasıhattap, qalyń buqaranyń kókeıindegi máselelerdi kóterý arqyly el múdesine qaltqysyz qyzmeti etip kele jatqanyn erekshe atap ótti.
Eske sala keteıik, «Arqa ajary» gazeti Sáken Seıfýllınniń negizin qalaýymen Aqmola qalasynda (qazirgi Astana) 1917 jyldyń shilde aıynan bastap, «Tirshilik» ataýymen shyǵaryla bastady. 1928 jylǵy 17 qańtarda Aqmola gýbernııasynyń ornyna Aqmola okrýgi qurylyp, 21 qyrkúıekte okrýgtik «Jańa Arqa» gazet jaryq kórip turdy. 1932 jylǵy 2 jeltoqsanda «Jańa Arqa» gazeti «Kolhoz ekpindisi» bolyp ózgertilip, Aqmola aýdandyq gazeti mártebesimen basyldy.
1939 jylǵy 14 qazanda Aqmola óz aldyna oblys bolyp quryldy. «Kolhoz ekpindisi» oblystyq gazet mártebesine ıe bolyp, 1939 jylǵy 29 qarashada Aqmola oblystyq «Stalın týy» gazetiniń alǵashqy sany jaryq kórdi.
1957 jyldan «Stalın týy» gazeti «Esil pravdasy» degen jańa ataýmen jalǵasty. 1961 jyly 17 qańtarda KPSS Ortalyq Komıtetiniń kezekti Plenýmynyń qaýlysymen Qazaqstannyń soltústigindegi bes oblystyń negizinde Tyń ólkesi uıymdastyryldy. Sol tusta osy bes oblystaǵy qazaq tilindegi gazetterdiń barlyǵy jabyldy. Tek 1961 jyldyń qańtar aıynyń sońyna taman «Esil pravdasy» gazetiniń negizinde «Tyń ólkesi» basylymy jaryq kóre bastady.
1965 jyly Tyń ólkesi taratylyp, sol jyldyń qarasha aıynda «Tyń ólkesiniń» sońǵy sandary jaryq kórdi de, Aqmola oblystyq «Kommýnızm nury» gazeti shyǵaryldy. 1978 jyly «Kommýnızm nury» Keńes Odaǵynyń Eńbek Qyzyl Tý ordenimen marapattaldy.
El táýelsizdiginiń saltanat qurýyna baılanysty «Kommýnızm nury» gazeti 1991 jyldyń 26 qańtarynan bastap «Arqa ajary» degen jańa ataýǵa ıe boldy.
Qazaqstan Respýblıkasy Prezıdentiniń 1999 jylǵy 8 sáýirdegi Jarlyǵymen Aqmola jáne Soltústik Qazaqstan oblystarynyń ákimshilik-aýmaqtyq qurylysyndaǵy ózgeristerge baılanysty Aqmola oblysynyń ortalyǵy Kókshetaý qalasyna kóshirilip, «Arqa ajary» gazeti 2007 jyldyń 1 qańtarynan bastap Kókshetaý qalasynda basylyp shyǵa bastady.
«Arqa ajary» gazeti óńirdiń áleýmettik-ekonomıkalyq, rýhanı damýyn tereń ashyp kórsetkeni úshin 2011 jyly Qazaqstan Respýblıkasy Prezıdentiniń grantyna ıe boldy. Osy kúni Jabal Erǵalıev basqaratyn «Arqa ajary» gazetiniń redaktsııasy jańa belesterdi baǵyndyrýda.
