Kókshetaýda seıften 22 mln teńgeni jymqyrǵan qylmysker sottaldy

KÓKShETAÝ. QazAqparat - Aqmola oblysynyń qylmystyq ister jónindegi mamandandyrylǵan aýdanaralyq sotynda qaraqshylyq jolmen 22,9 mıllıon teńgeni jymqyrǵan adamǵa sot úkimi shyqty. Bul týraly QazAqparat tilshisi oblystyq sottyń baspasóz qyzmetine silteme jasap habarlaıdy.

Sottyń úkimimen 24 jastaǵy Sh.-ǵa Qylmystyq kodekstiń 192-baby 4-bóliginiń 2-tarmaǵy boıynsha asa iri mólsherdegi bótenniń múlkin jymqyrý maqsatynda qaraqshylyq jasaǵany úshin 10 jyl merzimge bas bostandyǵynan aıyrý jazasy taǵaıyndaldy. Sonymen birge, sot jábirlenýshiniń (kúzetshiniń) paıdasyna 500 000 teńge mólsherinde moraldyq zııannyń ótemin óndirip aldy.

«Sotpen anyqtalǵandaı, Sh. 2020 jylǵy 23 qazanda túngi saǵat 03:00 shamasynda Kókshetaý qalasynda «Altyn Raýshan» JShS-niń aýmaǵyna betperde taǵyp kirgen, kúzetshini temir montırovkamen qorqytyp, onyń aıaq-qolyn baılaǵan. Odan keıin terezeni buzyp, qyzmettik úı-jaıǵa túsken, onda seıfti buzyp ashyp, 22 9000 000 teńge urlaǵan», - dedi vedomstvodan.

Sot otyrysy barysynda Sh. ózin kináli ekendigin ishinara moıyndady jáne usynylǵan dáleldemelerdi daýlaǵan joq. Sh-nyń kináliligi onyń óz aıǵaqtarymen, jábirlenýshi kúzetshiniń jáne basqa kýáalardyń aıǵaqtarymen, beınebaqylaý kameralardyń jazbalarmen, 22 457 000 teńge somasyna tárkilengen jeke tintý hattamasymen jáne istiń basqa da materıaldarymen rastalady.

«Aqmola oblystyq sotynyń qylmystyq ister jónindegi sot alqasymen qylmystyq ister jónindegi mamandandyrylǵan aýdanaralyq sotynyń Sh-ǵa qatysty úkimi ózgerissiz qaldyryldy», - dep tolyqtyrdy vedomstvodan.