Kókshetaýda Semeı ıadrolyq polıgonynyń jabylýyna arnalǵan halyqaralyq konferentsııa ótti

KÓKShETAÝ. QazAqparat - El Táýelsizdiginiń 30 jyldyq mereıtoıy sheńberinde Kókshetaý qalasynda Semeı ıadrolyq synaq polıgonynyń jabylýynyń 30 jyldyǵyna arnalǵan halyqaralyq ǵylymı-praktıkalyq onlaın konferentsııa ótti, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.

Shoqan Ýálıhanov atyndaǵy Kókshetaý ýnıversıtetiniń qatysýymen Aqmola oblystyq «Vaınah» sheshen-ıngýsh qoǵamy uıymdastyrǵan konferentsııa jumysyna ǵylymı ınstıtýttardyń ókilderi, Qazaqstan halqy Assambleıasynyń músheleri, bedeldi ǵalymdar men tarıhshylar, saıasattanýshylar, zertteýshiler, zııaly qaýym ókilderi, Qazaqstan, Reseı jáne Germanııadan ıadrolyq qarýsyzdaný salasyndaǵy sarapshylar qaýymdastyǵynyń ókilderi qatysty.

Jıynǵa qatysqan oblystyq ishki saıasat basqarmasynyń basshysy Altynaı Ámirenova el Táýelsizdiginiń 30 jyldyǵy jylynda konferentsııa este qalarlyqtaı ótkenin aıtty.

«Qazaqstannyń Tuńǵysh Prezıdenti - Elbasy Nursultan Nazarbaevtyń ıadrolyq qarýdy taratpaý salasyndaǵy qyzmeti jahandyq jáne óńirlik qaýipsizdikti qamtamasyz etýde asa zor ról atqardy. Bizdiń elimiz álemde kólemi jaǵynan ekinshi ıadrolyq synaq polıgonyn japqan jáne qýaty jaǵynan tórtinshi áskerı ıadrolyq arsenaldan óz erkimen bas tartqan birinshi el boldy. Osylaısha, Qazaqstan ıadrolyq qarýsyzdaný máselelerindegi ashyqtyq kúshin búkil álemge óziniń syrtqy saıasatynyń mańyzdy qaǵıdattarynyń birine aınaldyra otyryp, óz tájirıbesinde kórsetti», - dedi Altynaı Ámirenova.

Onlaın konferentsııa barysynda Qazaqstannyń qoǵamdyq-saıası qaıratkeri, aqyn, jazýshy, «Nevada» antııadrolyq qozǵalysynyń jetekshisi Oljas Súleımenov, geologııa-mıneralogııa ǵylymdarynyń doktory, professor Hýseın Gadaborshev (Germanııanyń Karlsrýe qalasy), Sheshen Respýblıkasy Ǵylym akademııasynyń vıtse-prezıdenti, professor, fızıka-matematıka ǵylymdarynyń doktory Ibragım Kerımov, Qazaqstan halqy Assambleıasy Keńesiniń múshesi, Qazaqstannyń «Vaınah» sheshender men ıngýshterdiń respýblıkalyq qaýymdastyǵynyń Basqarma múshesi ıÝsýp Kelıgov, Máskeý fızıka-tehnıkalyq ınstıtýtynyń joǵary energııalar fızıkasy zerthanasynyń meńgerýshisi Tagır Aýshev, RAE akademıgi, bıologııa ǵylymdarynyń doktory, Kókshetaý ýnıversıteti Aýyl sharýashylyǵy kafedrasynyń qaýymdastyrylǵan professory Ábiljan Qusaıynov sóz sóıledi.

Qatysýshylar óz kezeginde Semeı ıadrolyq polıgonynyń qorshaǵan ortaǵa, adam densaýlyǵyna áseri, polıgondy jabýdyń tarıhı faktileri, Qazaqstannyń Tuńǵysh Prezıdentiniń ıadrolyq qarýdy taratpaý salasyndaǵy róli týraly aıtty.

Aıta ketsek, Semeı ıadrolyq polıgony 1991 jyly 29 tamyzda Qazaq KSR Prezıdentiniń Jarlyǵymen jabyldy. 1949-1989 jyldar aralyǵynda polıgonda 456 ıadrolyq synaq ótkizildi.