Kókshetaýda saýda úıindegi órtten 50-den astam adam evakýatsııalandy
KÓKShETAÝ. KAZINFORM – Kókshetaýda kópqabatty turǵyn úıge japsarlana salynǵan saýda úıinen órt shyǵyp, 53 adam evakýatsııalandy, onyń 10-y – bala.
Aqmola oblysy TJD baspasóz qyzmetiniń málimetinshe, órt saýda úıiniń tóbe jabyndysynan shyqqan. Qyzyl jalyn 20 sharshy metrdi sharpydy.
«Oqıǵa ornynda TJD, PD kúshteri men quraldary, jedel medıtsınalyq járdem brıgadasy, energııamen jabdyqtaý jáne gaz qyzmetteriniń mamandary, jalpy sany 70 adam jáne 21 tehnıka jumys istedi. Órttiń saldarynan saýda úıi japsarlana salynǵan kópqabatty turǵyn úıden 53 adam baspaldaqtyń kómegimen evakýatsııalandy, onyń 10-y – bala. Sonymen birge oqıǵa ornynda evakýatsııalanǵan turǵyndarǵa TJD psıhologtary kómek kórsetti. Zardap shekkender joq. Órttiń sebebi anyqtalýda», - dedi vedomstvodan.
Osy rette, TJD qyzmetkerleri tótenshe jaǵdaı týyndaǵan jaǵdaıda «101 jáne «112» jedel jelisine qońyraý shalý qajettigin eske salady.
Aıta ketsek, budan buryn Aqmola oblysynda AN-2 ushaǵy janyp ketkenin jazǵan edik.
