Kókshetaýda saýda úıinde shyqqan órtke qatysty tyń derekter anyqtaldy
KÓKShETAÝ. QazAqparat - Kókshetaýda saýda úıinde shyqqan órtke qatysty tyń derekter anyqtaldy, dep habarlaıdy QazAqparat tilshisi QR ІІM TJK resmı ókili Rýslan Imanqulovqa silteme jasap.
Osyǵan deıin habarlaǵanymyzdaı búgin 12:35-te Kókshetaý qalasynyń Ábilqasymov kóshesi, 95 «A» mekenjaıynda ornalasqan eki qabatty «Trıýmf» saýda úıiniń shatyry men qabyrǵasynyń syrtqy qaptamasy órtke oranǵan bolatyn. TJK deregi boıynsha órt 13:05-te aýyzdyqtalyp, 13:22-de tolyqtaı sóndirildi. Órt saldarynan ǵımarattyń syrty búlindi. Jalyn 400 sharshy metr aýdandy sharpydy.
«Tilsiz jaýdy aýyzdaqtaýǵa TJD jeke quramynan 45 qyzmetkeri men 9 arnaıy órt sóndirý tehnıkasy jumyldyryldy. Qutqarýshylar 70 adamdy qaýipsiz jerge shyǵardy», dep kórsetilgen bolatyn habarlamada.
Abyroı bolǵanda adam shyǵyny bolǵan joq, sondaı-aq, ǵımaratyń ishine de zalal kelgen joq. Oqıǵanyń kýágerleri satýshylardyń aıtýynsha, órt saýda úıiniń irgesinde turǵan qoqys jáshiginen shyǵyp, keıin ǵımarattyń qabyrǵasyn sharpyǵan kórinedi.
Degenmen, vedomstvonyń keltirgen málimeti boıynsha, aǵymdaǵy jyldyń sáýir aıynda júrgizilgen tekseris barysynda atalmysh saýda úıinde órt qaýipsizdigi boıynsha 32 zańsyzdyqqa jol berilgen. Qazirgi kezde, órttiń naqtyly qaıdan shyqqany anyqtalýda jáne keltirilgen materıaldyq shyǵyn kólemi eseptelýde.
