Kókshetaýda Saǵyntaev jappaı kásipkerlikti damytý baǵdarlamasynyń iske asyrylý barysyn talqylady
ASTANA. QazAqparat - Búgin QR Premer-Mınıstri Baqytjan Saǵyntaev Aqmola oblysyna jumys sapary barysynda Ónimdi jumyspen qamtý jáne jappaı kásipkerlikti damytý baǵdarlamasy men «Serpin» áleýmettik jobasyn iske asyrý barysy jóninde keńes ótkizdi, dep habarlaıdy primeminister.kz .
Sharaǵa jergilikti atqarýshy jáne ortalyq memlekettik organdardyń, «Atameken» ulttyq kásipkerler palatasynyń ókilderi, memlekettik baǵdarlamalar men jobalardyń qazirgi qatysýshylary, sondaı-aq bıznes ókilderi qatysty.
Kezdesý aıasynda Ónimdi jumyspen qamtý jáne jappaı kásipkerlikti damytý baǵdarlamasy men «Serpin» áleýmettik jobasyn iske asyrý máseleleri, bıznes ortany damytý, shaǵyn nesıelendirý, kásibı jáne tehnıkalyq bilim berý, sonymen qatar jumyssyzdardy oqytý máseleleri qozǵaldy.
Atalǵan taqyryptar boıynsha QR ulttyq ekonomıka mınıstri Tımýr Súleımenov, QR bilim jáne ǵylym mınıstri Erlan Saǵadıev, QR aýyl sharýashylyǵy birinshi vıtse-mınıstri Qaırat Aıtýǵanov, QR eńbek jáne halyqty áleýmettik qorǵaý vıtse-mınıstri Birjan Nurymbetov, «Atameken» UKP basqarma tóraǵasynyń orynbasary Eldar Jumaǵazıev baıandamalarymen tanystyrdy.
Óz kezeginde kóterilgen máseleler boıynsha jeke sektordyń pozıtsııasyn «Novopek» JShS basqarýshy dırektory Aıdar Jaqypov, «Bastaý-Bıznes» jobasynyń qatysýshysy Olga Proskýrına, Qatarkól aýylynyń aýyl sharýashylyǵy kolledjiniń dırektory Sergeı Savelev, Şýchınsk qalasynyń Ekologııa jáne aýyl sharýashylyǵy kolledjiniń stýdenti Jarqynbek Amangeldıev, sondaı-aq «Serpin» jobasynyń túlekteri Qasymjan Turǵanbek pen beınekonferentsbaılanys rejıminde Maqsut Seıitkamal usyndy.
Qozǵalǵan taqyryptar boıynsha Aqmola oblysynyń ákimi Málik Myrzalın, Pavlodar oblysynyń ákimi Bolat Baqaýov, Soltústik Qazaqstan oblysynyń ákimi Qumar Aqsaqalov, Jambyl oblysynyń ákimi Kárim Kókirekbaev, Ońtústik Qazaqstan oblysynyń ákimi Janseıit Túımebaev, Shyǵys Qazaqstan oblysy ákiminiń orynbasary Ásem Núsipova jáne Qostanaı oblysy ákiminiń orynbasary Roza Kemalova túsinikteme berip ótti.
Óz sózinde Baqytjan Saǵyntaev qazirgi tańda Úkimet jumys oryndaryn ashýdyń úlken áleýetine ıe jańa ındýstrııalardy, servıstik ekonomıkany jáne týrızm salasyn damytýdan turatyn ekonomıkalyq ósimniń jańa modelin qurý boıynsha jumystar júrgizip jatqanyn atap ótti. Ákimdikterge osy qyzmet jolynda kóptegen jumystar atqaryp, turaqty jumys oryndaryn ashýǵa barynsha kóńil bólý kerektigi aıtyldy.
Іske asyrý jumystary bıyl bastalǵan, Ónimdi jumyspen qamtý jáne jappaı kásipkerlikti damytý baǵdarlamasynyń osy baǵyttaǵy orny erekshe. Ol jumysqa ornalasýǵa kómek kórsetý tetikterinen, jańadan bastap jatqan kásipkerlerge qoldaý kórsetý quraldarynan, sondaı-aq qysqamerzimdi kásibı oqytý kýrstarynan turady.
Qatysýshylar shara barysynda pikir almasyp, qoldanystaǵy Jumyspen qamtý baǵdarlamasyn jetildirý týraly usynystaryn aıtty. Keńes qorytyndysyn shyǵara otyryp, QR Premer-Mınıstri baǵdarlama tıimdiligin arttyrý maqsatynda tıisti sheshimderdi qabyldaý úshin memlekettik organdarǵa 10 kún ishinde atalǵan usynystardy jınaqtap, olardy QR Úkimetine usynýdy tapsyrdy.
