Kókshetaýda ruqsatsyz salynyp jatqan toǵyz qabatty turǵyn úı súriletin boldy
ASTANA. KAZINFORM – Kókshetaýda zań talaptaryn buza otyryp salynyp jatqan toǵyz qabatty turǵyn úı sot sheshimimen súriledi.
Aqmola oblystyq sotynyń azamattyq ister jónindegi sot alqasy Memlekettik sáýlet-qurylys baqylaý basqarmasynyń salynyp jatqan nysandy buzý týraly talabyn qanaǵattandyrǵan mamandandyrylǵan aýdanaralyq ekonomıkalyq sottyń sheshimin ózgerissiz qaldyrdy.
Sot málimetinshe, «MAG GROUP KZ» JShS Kókshetaý qalasynyń Saryarqa shaǵyn aýdanynda turǵyn úı qurylysyn júrgizgen.
Prokýratýra tekserýi barysynda nysannyń qajetti ruqsat qujattarynsyz salynyp jatqany anyqtalǵan. Osyǵan baılanysty Memlekettik sáýlet-qurylys baqylaý basqarmasyna prokýrorlyq qadaǵalaý aktisi engizilgen.
– 2026 jylǵy mamyrda seriktestik saraptamadan ótpegen jobalaý-smetalyq qujattama boıynsha jáne Memlekettik sáýlet-qurylys baqylaý basqarmasyna habarlama bermeı qurylys júrgizgeni úshin ákimshilik jaýapkershilikke tartyldy. Sonymen qatar basqarma seriktestikke nysandy buzý týraly talap qoıdy. Birinshi satydaǵy sot qurylys «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» zań talaptaryn buza otyryp júrgizilgenin anyqtap, talapty qanaǵattandyrdy, – dep habarlady sottan.
Anyqtalǵan zańbuzýshylyqtardyń qatarynda jobalaý-smetalyq qujattamanyń saraptamadan ótpeýi, tehnıkalyq jáne avtorlyq qadaǵalaýsyz qurylys júrgizilýi, sondaı-aq qurylys-montajdaý jumystarynyń bastalǵany týraly memlekettik organǵa habarlama berilmeýi bar.
Apellıatsııalyq saty birinshi satydaǵy sottyń qorytyndysymen kelisti.
Sot alqasy seriktestiktiń áreketinen adal emes minez-qulyq belgilerin de anyqtaǵan.
– Seriktestik Memlekettik sáýlet-qurylys baqylaý basqarmasynyń tekserý júrgizý týraly habarlamasyn alýdan jaltarǵan. Budan bólek, basqarma sotqa talap aryz bergennen keıin de qurylys jumystaryn jalǵastyryp, salynyp jatqan nysandaǵy páterlerdi satyp alý boıynsha úleskerlermen aldyn ala sharttar jasasqan, – dep tolyqtyrdy sottan.
Osy nysanǵa baılanysty buǵan deıin jergilikti atqarýshy organdar Kókshetaý turǵyndaryna salynyp jatqan úıden páter satyp alý kezinde qarajatynan aıyrylyp qalý qaýpi bar ekenin eskertken bolatyn.
Aıta keteıik, Astanada 1,7 mln sharshy metrden astam turǵyn úı súriledi.
