Kókshetaýda rýhanı jańǵyrýǵa qatysty bastamalardy qoldaýǵa shaqyrǵan qarar qabyldandy

KÓKShETAÝ.QazAqparat - Kókshetaýda «Nur Otan» partııasy Aqmola oblystyq fılıalynda «Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy ulttyq kod pen ulttyq biregeılikti qalyptastyrýdaǵy áskerılerdiń róli» degen taqyrypta dóńgelek ústel ótti, dep habarlaıdy QazAqparat tilshisi. 

Sharaǵa Kókshetaýda ornalasqan №5510 áskerı bóliminiń ofıtserleri men jaýyngerleri jáne tótenshe jaǵdaılar departamenti men qorǵanys departamenti mamandary qatysty.

«Ulan» ulttyq gvardııasy bas komandashysynyń orynbasary, general-maıor Muhametqalı Satov Elbasy maqalasynan týyndaıtyn mindetter men jastar arasynda otansúıgishtik qasıetti damytý jaıynda jan-jaqty áńgimelep berdi.
«Otansúıgishtik qasıet adam boıyna ulttyq sana men salt-dástúr negizinde darıdy. Elbasy maqalasynda kóterilip otyrǵan ulttyq kod degenimiz de osy» -deı kele, ol HVIII ǵasyrda 600 sarbazben jońǵarlardyń 50 myń qolyna qarsy turyp, on kún boıy toıtarys bergen qazaq hany Salqam Jáńgirdiń erligi jaıynda aıtyp berdi. Qazaq sarbazdaryn ózderinen áldeneshe ese kóp jaýǵa qarsy taısalmaı soǵystyryp, toıtarys bergizgen kúsh - elge, jerge degen súıispenshilik ekendigin, qazirgi jastardyń boıynda da sondaı otansúıgishtik qasıet bolǵanda ǵana elimiz ishki-syrtqy qaterlerden aman bolatynyn atap ótti.
«Nur Otan» partııasy oblystyq fılıaly tóraǵasynyń birinshi orynbasary Ǵalym Bekmaǵambetov, Qazaqstan halqy Aqmola Assambleıasynyń hatshysy Maral Jaqypova Elbasy maqalasynda kóterilgen rýhanı jańǵyrý halyqty joǵary bıikterge bastaıtyn baǵdar ekenin aıtty.
Shara sońynda oǵan qatysýshylar Memleket basshysy maqalasynan týyndaıtyn rýhanı jańǵyrýǵa qatysty bastamalardy qoldaýǵa shaqyrǵan qarar qabyldady.