Kókshetaýda «Rýhanı jańǵyrý» óńirlik saraptamalyq keńesiniń otyrysy ótti
Shoqan Ýálıhanov atyndaǵy Kókshetaý memlekettik ýnıversıtetinde uıymdastyrylǵan is-sharaǵa memlekettik qyzmetkerler, óńirlik saraptamalyq keńes, «Rýhanı jańǵyrý» óńirlik jobalyq keńsesi, sonymen qatar, qoǵam belsendileri men buqaralyq aqparat quraldarynyń ókilderi qatysty.
Saraptamalyq keńes otyrysyna qatysýshylar úshin ýnıversıtettiń foıesinde stýdentterdiń «Rýhanı jańǵyrý» baǵdarlamasyna arnalǵan shyǵarmashylyq jumystarynyń kórmesi uıymdastyryldy.
Keńes otyrysynda «Rýhanı jańǵyrý» baǵdarlamasynyń 2019 jyly atqarylǵan is-sharalarynyń qorytyndysy shyǵarylyp, aldaǵy josparlar talqylandy.
Іshki saıasat basqarmasynyń arnaıy jobalar bóliminiń basshysy Arhat Aıbabınniń aıtýynsha, bıylǵy jyly «Rýhanı jańǵyrý» baǵdarlamasyn júzege asyrý boıynsha oblystyq jospardy qurastyrýda jańa talaptar men úrdister engizilip otyr.
«Rýhanı jańǵyrý» baǵdarlamasy qolǵa alynǵan 3 jyl ishinde 2 mıllıonnan astam adamnyń qatysýymen 7-den astam is-shara júzege asyrylǵan», - dedi Arhat Aıbabın.
Bólim basshysy atap ótkendeı, 2019 jyly «Týǵan jer» arnaıy jobasy sheńberinde metsenattardyń esebinen qala, aýyldyq eldi mekenderdi damytý baǵytynda áleýmettik mańyzy zor nysandar salyndy. Jyl ishinde oblysta jalpy quny 5,5 mıllıard teńge bolatyn 591 áleýmettik bastama júzege asyryldy. Onyń ishinde 68 nysan qalpyna keltirildi, 86 nysan jańadan salyndy, sondaı-aq, 437 áleýmettik bastama qoldaý tapty.
