Kókshetaýda «Rýhanı jańǵyrý» baǵdarlamasy sheńberinde 2 myńnan astam shara ótti
Bul týraly óńirlik kommýnıkatsııalar qyzmetinde ótken brıfıngte qala ákimi Amangeldi Smaıylov aıtty, dep habarlaıdy QazAqparat tilshisi.
Brıfıngte aıtylǵandaı qala ákimi aldymen ulttyq qundylyqtarymyzdy eskerip, tanymdyq jaǵynan bilýimizge úlken jol ashqan Elbasynyń «Rýhanı jańǵyrý» baǵdarlamasynyń mańyzdylyǵyna toqtaldy. Memlekettik baǵdarlamany júzege asyrýǵa kókshetaýlyqtar da bir kisideı atsalyp otyrǵandyǵy aıtyldy.
«Baǵdarlama qolǵa alynǵannan beri oblys ortalyǵynda 186 joba men 2 myńnan astam shara júzege asyrylǵan. Sonyń ishinde Kókshetaý qalasynyń 195 jyldyǵyn atap ótý sheńberinde «Quraq kórpe fest» jáne kórkemóner sheberleriniń «Kókshetaý juldyzdary» qalalyq baıqaýy, «Bıznes balalarmen birge, bıznes balalar úshin» startap jobalarynyń baıqaýy, «Qulager» ulttyq jáne halyqtyq sport túrlerinen oblystyq spartakıada uıymdastyrylǵanyn atap ótýge bolady. Jastar jyly sheńberinde «Búgingi jastar – erteńgi eldiń tarıhy» jastar forýmy ótkizildi», – deıdi qala ákimi.
Jalpy, «Rýhanı jańǵyrý» baǵdarlamasy júzege asyryla bastaǵan sátten beri oǵan 100-den astam metsenat, 114 úkimettik emes uıym men bastamashyl top, 10 myńnan astam erikti tartylǵan. Olardyń Otanǵa degen súıispenshiligi, jaýapkershiligi jáne naǵyz patrıottyq sezimi úlgi bolarlyqtaı.
Budan bólek, oblys ortalyǵynda «Týǵan jer» baǵdarlamasy aıasynda iske asyrylǵan jobalar da aıtýǵa turarlyq. Atalmysh baǵdarlama boıynsha jyl basynan beri 140 mıllıon teńgeden astam qarajatqa eki sport alańy men bir shaǵyn fýtbol alańy salyndy.
Ótken jyly jańadan ashylǵan ІT mektebiniń aýlasynda «Uly dala urpaqtary» etnografııalyq lageri uıymdastyryldy. Mádenıet salasynda «Ónegeli otbasy – Rýhanı Jańǵyrýdyń ózegi», «Aqyndar aıtysy», «Qazaqshańyz qalaı?», «Úsh baqytym», «Ashyq aspan astyndaǵy kitaphana» jobalary júzege asyryldy. Ulttyq dombyra kúnine oraı Sh.Qusaıynov atyndaǵy oblystyq mýzykalyq drama teatrynyń aldyna bıiktigi 11 metr «Dombyra» eskertkishi ornatyldy.
«Elbasy N.Nazarbaev: «Biz 2025 jyldan bastap álipbıimizdi latyn álipbıine kóshirýge kirisýimiz qajet», dep atap ótkendeı, latyn grafıkasyna kóshýdiń mańyzdylyǵy týraly keńinen aqparattandyrýdy nasıhattaý jumysy 20 myńnan astam halyqty qamtydy, 575 is-shara ótkizildi. Bul jumysty odan ári de jalǵastyratyn bolamyz», – dep sózin qorytyndylady qala ákimi.
