Kókshetaýda Roza Baǵlanovanyń 100 jyldyǵyna arnalǵan kontsert ótti
«Kókshetaý» mádenıet saraıynda «Qazaqkontsert» memlekettik kontserttik uıymynyń ártisteri men shyǵarmashylyq ujymdary óner kórsetken kontsertte Erlan Rysqalı, Azamat Jyltyrkózov, Ardaq Balajanova, Klara Tólenbaeva, Erbolat Shaldybekov, Dinıslambek Jaılaýbaı, Bıbigúl Januzaq sekildi tanymal óner maıtalmandarymen birge «Astana sazy» memlekettik folklorlyq ansambli shyǵyp, kúmis kómeı ánshi Roza Baǵlanovanyń repertýarynan ánderdi shyrqady.
«Bıyl bulbul ánshimiz Roza Baǵlanovanyń 100 jyldyq mereıtoıy. Áıgili ánshimizdiń altyn qorynda 120-ǵa jýyq án bar. Ańyz-adam, qazaq estradasynyń, qazaq óneriniń jarqyn juldyzy Roza Baǵlanovanyń esimi «Qazaqkontsert» memlekettik kontserttik uıymyna» berilip otyr. Onyń esimi halqymyzdyń jadynda máńgi saqtalady», – deıdi Qazaqstannyń eńbek sińgen qaıratkeri, dástúrli ánshi Erlan Rysqalı.
Aıta ketsek, Qazaqstan Respýblıkasynyń Prezıdenti Qasym-Jomart Kemeluly Toqaev uly ánshiniń esimin halyq jadynda máńgi saqtaý sharalaryn qabyldaýdy tapsyryp, el Úkimetiniń 2021 jyldyń 17 tamyzyndaǵy qaýlysyna sáıkes «Qazaqkontsert» memlekettik kontserttik uıymyna» Qazaqstannyń «Halyq ártisi», «Halyq qaharmany» Roza Tájibaıqyzy Baǵlanovanyń esimi berildi.
ıÝNESKO kóleminde atalyp ótiletin bulbul ánshiniń mereıtoıy osy jyldyń 1 naýryzynda Nur-Sultan qalasynda saltanatty túrde ashylyp, respýblıkanyń barlyq aımaǵynda uıymdastyrylyp jatyr.
Qazaqstannyń mádenı astanasy Kókshetaý qalasynan bastaý alǵan gastroldik sapar SQO, Qaraǵandy, Pavlodar, Shyǵys Qazaqstan oblystarynda jalǵasady.
Mádenıet jáne sport mınıstrliginiń bastamasymen júzege asyrylatyn bul shara buqaralyq sıpatqa ıe bolyp, jyl kóleminde elimizdiń barlyq óńirinde ótkiziledi.
