Kókshetaýda əriptesin óltirgen polıtseıge qatysty sot protsesi bastaldy
KÓKShETAÝ. QazAqparat - Búgin Kókshetaýda Aqmola oblysynyń qylmystyq ister jónindegi mamandandyrylǵan aýdanaralyq sotynda ІІD Krımınaldyq polıtsııa basqarmasynyń burynǵy qyzmetkeri Jənibek Baımurzınge qatysty qozǵalǵan qylmystyq is boıynsha alǵashqy sot protsesi ótip, onda kýágerlerden jaýap alyndy, dep habarlaıdy "QazAqparat" HAA tilshisi oblystyq sottyń baspasóz qyzmetine silteme jasap.
Sottyń məlimeti boıynsha, aldyn ala tergeý organdarymen J.Baımurzınge QR QK-niń 99-baby 1-bólimi (kisi óltirý), 287-babynyń 3-bólimi (oq-dərilerdi zańsyz ıelený, saqtaý, ózimen birge alyp júrý), 291-babynyń 1-bólimi (qarý urlaý), 287-babynyń 4-bólimi (qarý men oq-dərilerdi birneshe ret zańsyz ıelený, saqtaý, tasymaldaý nemese ózimen birge alyp júrý), 188-babynyń 1-bólimi (urlyq), 384-babynyń 3-bólimi (resmı qujattardy urlaý jáne jasyrý) boıynsha aıyptar taǵylyp otyr.
Eske sala keteıik, 2016 jyldyń 25 jeltoqsan kúni Kókshetaý qalalyq ІІB qyzmetkeri, aǵa leıtenant Darhan Elamanov kezekshilikten shyqqan soń, izim-qaıym joǵalyp ketedi. Darhandy jabylyp izdegen jaqyndary men oblystyq ІІD qyzmetkerleri birer kúnnen keıin onyń óli denesin qala shetindegi Kenesary aýylynyń mańynan tabady. Kúdiktini ustaý úshin polıtseıler marqumnyń uıaly telefonyn tekserip, sońǵy ret kimdermen sóıleskenin anyqtaıdy. 26 jeltoqsanda Aqmola oblystyq ІІD qyzmetkerleri jedel-izdestirý sharalary barysynda 2016 jyldyń 25 jeltoqsanynda joǵalyp ketken aǵa leıtenant Darhan Elamanovty óltirdi degen kúdik boıynsha polıtsııa qyzmetkeri, 32 jastaǵy maıor Jánibek Baımurzındi ustady. Kúdiktiniń sol kezde bergen túsiniktemelerine qaraǵanda,ol bul qylmysqa Elamanovtyń jeke basyna degen jek kórýshilikten barǵan.
Osylaısha, kúdikti eki aıǵa ýaqytsha ustaý oqshaýlaǵyshyna toǵytylyp, ústinen QR QK-niń «Kisi óltirý» baby boıynsha sotqa deıingi óndiristik is qozǵaldy. Kókshetaý qalalyq sotynyń 2017 jylǵy 10 aqpandaǵy qaýlysyna sáıkes, Baımurzınge qatysty qamaýda ustaý túrindegi bultartpaý sharasy 27 naýryzǵa deıin uzartyldy. Odan keıin qylmystyq is kúdikti men onyń qorǵaýshysyna tanysýǵa joldandy.
