Kókshetaýda Prezıdenttiń «Ádiletti qoǵamǵa – shynshyl sóz» atty jańa kitaby tanystyryldy
KÓKShETAÝ. KAZINFORM – Kókshetaýdaǵy Maǵjan Jumabaev atyndaǵy oblystyq ámbebap ǵylymı kitaphanada Qazaqstan Prezıdenti Qasym-Jomart Toqaevtyń ár jyldary aıtqan tańdaýly sózderi men oı-tujyrymdary toptastyrylǵan «Ádiletti qoǵamǵa – shynshyl sóz» atty jańa jınaqtyń tusaýkeseri ótti, dep habarlaıdy Aqmola oblysynyń ákimdigi.
Іs-sharaǵa oblystyń memlekettik organdarynyń ókilderi, qoǵam belsendileri, eńbek ardagerleri, jazýshylar men jastar qatysty.
Kezdesýdi ashqan Aqmola oblysy ákiminiń orynbasary Dosulan Aıtbaev óńirge kitaptyń alǵashqy partııasy jetkizilgenin aıtty. Jańa basylymdar qala jáne aýdan kitaphanalaryna, sondaı-aq jastar uıymdaryna beriledi.
– Memleket basshysy ultymyzdyń kóbirek kitap oqý qajettigin birneshe ret atap ótti. Bul kitap – jaı ǵana oı-tolǵamdar jınaǵy emes, árqaısymyz úshin mańyzdy baǵdar. Onyń óz oqyrmanyn taýyp, jastarǵa paıdaly bolyp, ortaq bolashaǵymyz týraly oılanýǵa yqpal etýi mańyzdy, – dedi Dosulan Aıtbaev.
Jınaqqa Memleket basshysynyń ár jyldary buqaralyq aqparat quraldarynda jaryq kórgen maqalalary, túrli jıyndar men kezdesýlerde sóılegen sózderi men baıandamalary engizilgen.
Sondaı-aq kitapta Qasym-Jomart Toqaevtyń ózi jazǵan «Svet ı ten», «Preodolenıe», «Kak eto bylo... Hronıka volnenıı v Pekıne» atty eńbekterindegi oı-tujyrymdary qamtylǵan.
Basylymnyń negizgi maqsaty – Memleket basshysynyń tańdaýly sózderi men tujyrymdary arqyly onyń qaıratkerlik tulǵasyn, saıası jáne zııatkerlik kózqarasyn kópshilikke tanystyrý. Sonymen birge qazirgi Qazaqstanda júrgizilip jatqan memlekettik saıasattyń erekshelikteri men negizgi basymdyqtary týraly jınaqy túsinik qalyptastyrý kózdelgen.
Kitapta ádiletti memleket qurý, halyq birligi, azamattardyń jaýapkershiligi, ǵylym, bilim jáne mádenıetti damytý máseleleri qozǵalǵan. Jınaq saıasattanýshylarǵa, zertteýshilerge, qalyń oqyrmanǵa jáne ásirese jastarǵa arnalǵan.
Tusaýkeser barysynda urpaqtar sabaqtastyǵy men qazirgi jastar úshin mańyzdy qundylyqtar máselesine de nazar aýdaryldy. Qatysýshylar tsıfrlyq tehnologııalar qarqyndy damyp, qoǵam jyldam ózgerip jatqan kezeńde el tarıhy men ata-baba murasyn umytpaýdyń mańyzyn atap ótti.
– Bul kitapty oqı otyryp, Prezıdenttiń qoǵam aldyna qoıyp otyrǵan mindetterin tereńirek túsinesiń. Onyń ár sózinen elimizdiń bolashaǵy men qaýipsizdigine degen qamqorlyqty sezinýge bolady. Bul oılardy óskeleń urpaqqa jetkizý biz úshin mańyzdy, – dedi Jabal Erǵalıev.
Uıymdastyrýshylardyń málimetinshe, tusaýkeserge aqmolalyqtardyń ár býyny qyzyǵýshylyq tanytqan. Aǵa býyn úshin jınaq eldiń júrip ótken jolyna qaıta úńilýge múmkindik berse, jastarǵa ózderiniń el bolashaǵyndaǵy rólin tereńirek túsinýge jol ashady.
Aldaǵy ýaqytta óńirlik kitaphanalarda jańa jınaqqa arnalǵan taqyryptyq kezdesýler men pikirtalastar ótkizý josparlanyp otyr.
