Kókshetaýda polıtsııanyń zamanaýı ýchaskelik pýnkti ashyldy
KÓKShETAÝ. QazAqparat - Kókshetaýda polıtsııanyń zamanaýı jańa ýchaskelik pýnkti ashyldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, jańa nysan medıtsına qyzmetkerleriniń kásibı merekesine oraı Aqmola oblystyq kópbeıindi aýrýhanasy ǵımaratynda ashylyp otyr.
Sharaǵa QR Parlamenti Májilisi men Aqmola oblystyq máslıhattyń burynǵy depýtaty, oblystyq aýrhananyń burynǵy bas dárigeri, Shoqan Ýálıhanov atyndaǵy Kókshetaý memlekettik ýnıversıtetiniń medıtsına fakýlteti kafedrasynyń meńgerýshisi Serik Aıaǵanov, oblystyq aýrhananyń bas dárigeri Nurlan Jarov, Aqmola oblystyq Polıtsııa departamentiniń bastyǵy, general-maıor Berik Bilálov pen qalalyq jáne aýdandyq bólimshelerdiń basshylary qatysty.
«Jańa ýchaskelik pýnktegi polıtseıler ákimshilik aýmaqtaǵy 17 myń turǵynǵa baqylaý júrgize alady. Onda tańǵy saǵat 09:00-den túngi 01:00-ge deıin ýchaskelik ınspektor, polıtsııanyń ıývenaldy jáne krımınaldy qyzmetkerlerinen quralǵan 7 tártip saqshysy jumys isteıtin bolady. Ýchaskelik pýnktiniń ashylýy sol aýmaqta qoǵamyq tártip buzýshylyqty aldyna alyp, der kezinde áreket etýge múmkindik beredi. Sonymen qatar, emdeý mekemesi aýmaǵynda jol qaýipsizdigin qamtamasyz etedi. Buǵan deıin atalmysh aýmaqtar № 1 jáne №7 polıtsııanyń ýchaskelik pýnkterine qarady. Endi jergilikti turǵyndar ótinishterin alysqa barmaı osy jerde qaldyryp, polıtsııanyń kómegine júgine alady», deıdi vedomstvonyń baspasóz qyzmetindegiler.
Kabınet zamanaýı kompıýter, jıhaz jáne baılanys quralymen jabdyqtalǵan. Ýchaskelik pýnkti men emdeý mekmesiniń aýmaǵyna beınebaqylaý kameralary ornatylǵan. Beınebaqylaý kameralaryndaǵy málimetter Jedel basqarý ortalyǵyna túsip otyrady. Osylaısha,polıtsııa qyzmetkerleri jańadan ashylǵan polıtsııanyń ýchaskelik pýnktiniń aýmaǵyn táýlik boıy baqylamaqshy.
Aıta keteıik, qazirgi kezde Kókshetaý qalasy aýmaǵynda 10 polıtsııanyń ýchaskelik pýnkti jumys isteıdi. Onyń biri, Nurly kósh kentinde ornalasqan.
