Kókshetaýda polıtseı 10 adamdy órtten qutqardy
KÓKShETAÝ. QazAqparat - Kókshetaý qalasynda tártip saqshylary órtenip jatqan turǵyn úılerdegi 10 adamdy qutqardy, dep habarlaıdy QazAqparat tilshisi Aqmola oblysynyń PD baspasóz qyzmetine silteme jasap.
Vedomstvonyń deregi boıynsha oqıǵa qarashanyń 25-i kúni keshki ýaqyt 21:30 shamasynda Kóktem shaǵyn aýdany «burynǵy áýejaı» aýmaǵyndaǵy turǵyn úılerde bolǵan.
Tilsiz jaýdy Kókshetaý qalalyq Polıtsııa basqarmasynyń jol-patrýldik polıtsııasynyń kavalerııalyq vzvodynyń qyzmetkeri polıtsııanyń kishi serjanty Ashat Erkashev jáne ulttyq gvardııanyń úsh áskerı qyzmetshisi atalmysh aýmaqta patrýldeý kezinde baıqap qalǵan.
«Olar birden, órt sóndirý brıgadasyn shaqyrtyp, ózderi órt shyqqan úıde adamdar bolsa, solardy dereý qutqarý úshin umtylady. Terezeden ishte adamdar baryn baıqaǵan polıtseıler birden terezeni buzyp kirip, 3 balasymen anasyn syrtqa alyp shyǵady. Al, ájesi óz kúshimen dalaǵa shyǵyp úlgeredi.
Іshtegi adamdardyń barlyǵy syrtqa shyǵarylǵanyna kóz jetkizgen tártip saqshylary órt endi tutana bastaǵan kórshi úıdegi adamdardy qutqarýǵa umtylady. Onda tártip saqshylary 4 balasy men anasyn syrtqa shyǵýyna kómektesti.
Sondaı-aq, polıtsııanyń kishi serjanty Ashat Erkashev kez kelgen sátte jarylýy múmkin eki birdeı gaz ballonyn qaýipsizge jerge alyp shyqty», dep dep túsindirdi baspasóz qyzmetindegiler.
Aldyna ala málimetter boıynsha, órttiń peshtegi aqaýdan shyqqany málim bolyp otyr.
Ashattyń batyl áreketi men gvardııashylardyń is qımylyn durys úılestirýiniń arqasynda qaıyǵyly jaǵdaıǵa jol berilmedi
«Turǵyn úıdiń órtenip jatqanyn kórgende birden adamdardy qutqarýdy ǵana oıladym. Olardyń arasynda balalar da boldy. Barlyǵy qasqaǵym sátte órbidi...», - deıdi Ashat.
Aqmola oblysynyń PD basshylyǵy adam ómirine arasha túsken polıtsııanyń kishi serjanty Ashat Erkashevti marapattaý týraly sheshim qabyldap otyr.
