Kókshetaýda páterde gaz jarylyp, 91 jastaǵy qarııa qutqaryldy
ASTANA. KAZINFORM — Kókshetaýda kópqabatty úıdegi páterde gaz-aýa qospasy jarylyp, 91 jastaǵy turǵyn qutqarýshylardyń kómegimen qaýipsiz jerge shyǵaryldy, dep habarlaıdy Kazinform agenttiginiń tilshisi.
Aqmola oblysy TJD baspasóz qyzmetiniń málimetinshe, Sádýaqasov kóshesindegi alty qabatty turǵyn úıdiń úshinshi qabatyndaǵy páterden tarsyl estilgeni týraly «112» qyzmetine habarlama túsken.
TJM bólimsheleri oqıǵa ornyna kelgende páterde gaz jarylǵany anyqtalǵan. Úıde kólemi 19 lıtrlik gaz ballony bolǵan. Oqıǵa kezinde úıdiń qurylymdary búlinbegen, órt te shyqpaǵan.
— Turǵyndardy evakýatsııalaýǵa negiz bolmady. Páterde bolǵan 91 jastaǵy qarııa qutqarýshylardyń kómegimen qaýipsiz jerge shyǵaryldy, — dedi Aqmola oblysy TJD resmı ókili Ersaıyn Qoıshybaev.
1935 jyly týǵan turǵyn jedel járdem brıgadasyna tapsyrylyp, keıin Aqmola oblysyndaǵy aýrýhanalardyń birine jetkizilgen. Qazir ol em qabyldap jatyr.
Qutqarýshylardyń aldyn ala boljamynsha, oqıǵa gaz ballonyn paıdalaný kezinde qaýipsizdik talaptarynyń saqtalmaýynan bolǵan.
Eske sala keteıik, buǵan deıin Atyraýda temir qabyldaý pýnktiniń aýmaǵynda eki vagon órtengeni habarlanǵan bolatyn.
