Kókshetaýda páter tonaǵan adam urlyqtan túsken aqshasyn kazınoda uttyrdy
KÓKShETAÝ. QazAqparat - Kókshetaýda iri kólemde páter tonaý qylmysy áshkerlendi. Bul týraly oblystyq ІІD baspasóz qyzmetinen habarlady.
Polıtseılerdiń deregi boıynsha úı ıesiniń joqtyǵyn paıdalanǵan eki qaskúnem páterge túsip, ondaǵy aqsha jáne áshekeı zattardy úptep ketken.
«Aǵymdaǵy jyldyń 29-shy tamyzynda Kókshetaý qalalyq ІІB azamatsha habarlasyp, 8-29 tamyz aralyǵynda belgisiz bireýlerdiń páterin tonap ketkenin aıtqan. Zardap shegýshiniń sózine qaraǵanda tonaýshy páterge balkonnyń esigin buzyp kirip, seıftegi 18 myń AQSh dollary men quny 3 800 000 teńgeniń altyn buıymdaryn qoldy qylǵan», - delingen habarlamada.
Osy kezde úı ıesi shetelde bolǵan. Sondyqtan, urlyqtyń naqty qashan jasalǵanyn bilmeıdi. Alaıda, jedel izdestirý sharasyn qolǵa alǵan polıtseıler kóp uzatpaı, aryz túskennen keıin kelesi kúni kúdiktilerdi qolǵa túsirdi.
Olar osyǵan deıin dál osyndaı qylmys úshin sotty bolǵan 30 jáne 28 jastaǵy jergilikti eki turǵyn bolyp shyqty. Qazirgi kezde, kúdiktiler qylmysyn moıyndady, olardyń ústerinen QR QK-niń 188-babynyń 3-bólimi boıynsha qylmystyq sot óndirisi qolǵa alyndy.
Sonymen qatar, ustalynǵan adamnyń biri urlyqtan tapqan aqshany kazınoda utylyp qalǵany da anyqtaldy. Al, altyn buıymdardyń bir bóligi ıesine qaıtaryldy. Kúdiktilerdiń osyndaı ózge qylmysqa qatysy bar joǵy anyqtalý ústinde.
