Kókshetaýda páter baǵasy ázirge turaqty-rıeltor
KÓKShETAÝ. QazAqparat - Kókshetaýda páter baǵasy ázirge turaqty. Bul týraly «Garant» jyljymaıtyn múlik agentiginiń rıeltory Gúlnár Zııaddenova málim etti, dep habarlaıdy «QazAqparat» HAA tilshisi.
Onyń aıtýynsha, osy ýaqytqa deıin qalada páter baǵasy kúrt tómendep, qazir birshama turaqtalǵan kórinedi.
«Astanalyq oblys ortalyǵy bolǵandyqtan Kókshetaýda páter baǵasy elimizdiń ózge oblystarymen salystyrǵanda birshama joǵary bolsa, iri megapolıstermen salystyrǵanda arzanyraq. Shaharda bir bólmeli páterdiń baǵasy 5 mıllıon teńgeden, eki bólmeli páter 5,6 mıllıon jáne úsh bólmeli 7,5 mıllıon teńgeden joǵarlaı bastaıdy. Onyń ózi salynǵan merzimine baılanysty», - deıdi Gúlnár Zııaddenova.
Turǵyn úı naryǵynyń mamany páter baǵasynyń tómendeýine turǵyn úılerdiń kóptep salynýy da oń áser etip otyrǵanyn atap ótýde.
«Elimizde sońǵy kezderi turǵyn úılerdi kóptep sala bastady. Onyń ishinde Kókshetaý qalasynda da jańa úılerdiń sany jyl ótken saıyn artýda. Bul árıne, turǵyn úı baǵasynyń túsýine zor áser etpese de, biraz yqpaly tıdi. Oǵan qosa, «Qoljetimdi baspana-2020» jáne «Nurly jol» tárizdi memlekettik baǵdarlamar bar. Turǵyndardyń kóbi qolda bar eski páterlerin satyp, jańasyn nemese táýirleýin satyp alýǵa tyrysady. Sol sebepti satyp alatynnan góri, satamyn deýshiler basymyraq. Jalpy, qunyna keletin bolsaq, ázirge, Kókshetaý qalasynda páter baǵasy joǵaryda aıtqan shamada turaqty saqtalýda. Aldaǵy ýaqytta qalaı bolatyny belgisiz. Ol ýaqyttyń enshisinde», - dedi G.Zııaddenova.
