Kókshetaýda páter alyp beremin dep 20 adamdy aldaǵan alaıaq áıel ustaldy
KÓKShETAÝ. QazAqparat - Kókshetaýda memlekettik baǵdarlama arqyly páter alyp beremin dep talaı adamdy san soqtyryp kelgen alaıaq áıel quryqtaldy.
Bul týraly oblystyq ІІD baspasóz qyzmetinen habarlady. Polıtseılerdiń málimeti boıynsha Kókshetaý qalalyq ІІB qyzmetkerleri 20-dan astam alaıaqtyq qylmys jasaǵan jergilikti 1977 jylǵy áıeldi qolǵa túsirip, ústinen qylmystyq is qozǵady. "Kúdikti 2013-2014 jyldar aralyǵynda memlekettik baǵdarlama arqyly páter alyp beremin dep, turǵyndardy sendirip, syıaqy retinde qomaqty aqsha alyp otyrǵan. Keıin ýaqyt óte kele páterde joq, aqsha da joq, tipti telefonǵa jaýap bermegen. Qazirgi kezde alaıaq áıeldiń 20-dan astam adamdy osylaı san soqtyryp ketkeni belgili bolyp otyr. Kúnnen-kúnge kúdiktiniń qurbany bolǵandardyń sany artýda. Sońǵy bir táýliktiń ózinde barlyǵy 3 mıllıon 740 myń teńgege aldanǵan 6 adam aryz berdi. Osyǵan baılanysty kúdiktiniń ústinen QR QK 190 babynyń 1 bólimi boıynsha qylmystyq is qozǵalyp, sotqa deıingi tergeý amaldary júrgizilýde. Qazirgi kezde kúdikti kepilmen bosatyldy", - deıdi polıtseıler.
