Kókshetaýda ózin-ózi óltirmekshi bolǵan er adamdy polıtsııa qutqaryp qaldy

KÓKShETAÝ. KAZINFORM – Kókshetaýda qolyndaǵy tamyryn kesip, ózin-ózi óltirmekshi bolǵan er adamdy polıtsııa qyzmetkeri qutqaryp qaldy. 

Aqmola oblysy PD baspasóz qyzmetiniń málimetinshe, keleńsiz jaǵdaı 23 shilde kúni tapa-tal túste Kókshetaý qalasynyń ortalyq alańynda bolǵan. Alańdy patrýldeý kezinde patrýldik polıtsııa batalonynyń qyzmetkeri, aǵa leıtenant Serikbaı Qazbekov «Cinema Alem» kınoteatrynyń janynda beıtanys er adamnyń óz qolynyń tamyryn kesip jatqanyn kórgen. Polıtsııa qyzmetkeri birden kómekke umtylǵan. 

«Tártip saqshysy er adamdy sózge tartyp, onyń mundaı áreketke barýyna jeke sıpattaǵy másele ekenin anyqtady. Artynsha dereý jaqyn mańdaǵy statsıonarlyq polıtsııa beketine jetkizip, bilegine jgýt saldy jáne jedel járdem brıgadasyna tapsyrdy. Qazirgi ýaqytta er adamnyń ómiri men densaýlyǵyna qaýip tónip turǵan joq, ol dárigerlerdiń baqylaýynda», - dedi vedomstvodan. 

Aıta ketsek, budan buryn Aqmola oblysynda sýıtsıd jasaǵan stýdenttiń ólimi tergelip jatqanyn jazǵan edik.