Kókshetaýda ózendegi muz astyna túsip ketken balany qutqarǵan adam marapattaldy

KÓKShETAÝ. KAZINFORM - Kókshetaýda Qylshaqty ózeninde sýǵa batyp bara jatqan balany qutqarǵan er adam medalmen marapattaldy.

Aqmola oblysy TJD baspasóz qyzmetiniń málimetinshe, búgingi kúnniń batyrynyń esimi – Marat Zııadın. Ol 5 aqpanda úıine bara jatqan kezde Qylshaqty ózeninde muzdyń astyna túsip ketken balany kórip, dereý kómekke keledi. Onyń shıraq qımylynyń arqasynda bala aman qalady. Sýdan alyp shyqqan balaǵa ol óziniń ústindegi syrt kıimin kıizip, úıine deıin jetkizedi.

Aqmola oblysy TJD bastyǵynyń mindetin atqarýshy Qanat Dospaev batyrǵa «Sýǵa batqandardy qutqarǵany úshin» medalin tapsyryp, erligi úshin alǵysyn bildirdi.

«Aramyzda júrgen osyndaı batyrlardyń erligi nazardan tys qalmaýy tıis. El Marat sııaqty óz batyrlaryn tanýy kerek. Men qalamyzdyń batyryn marapattaý múmkindigine ıe bolǵanyma qýanyshtymyn», - dedi quttyqtaý sózinde Qanat Dospaev.

Aıta ketsek, budan buryn Aqmola oblysynda qutqarýshylardyń kómegimen 11 jastaǵy naýqas aýrýhanaǵa jetkizilgenin jazǵan edik.