Kókshetaýda ótken «Baspaldaq» jarysyna 300-ge jýyq adam qatysty
KÓKShETAÝ. QazAqparat - Kókshetaýda «Baspaldaq» baspaldaqpen júgirý jarysy ótti, dep habarlaıdy QazAqparat tilshisi Aqmola oblysynyń dene shynyqtyrý jáne sport basqarmasyna silteme jasap.
Jyl saıyn ótkizý dástúrge aınalǵan jarys bıyl 22-ret uıymdastyrylyp otyr. Jarysqa salaýatty ómir saltyn ustanǵan áýesqoılar men kásibı sportshylardan quralǵan 300-ge jýyq adam qatysty.
«QR sport qaıratkeri Ibragım Tıagalıevtiń qurmetine arnalǵan jarysqa qatysýshylar Abaı kóshesiniń boıyndaǵy Týtuǵyrdan bastap, Buqpa taýynyń bıik shyńyna deıin 760 metr júgirip ótýi tıis boldy. Baspaldaqpen taýǵa órmelep, júgirgender arasynda 5 jastan asqan balalar men jasy 70-ke taıaǵan qarııalar da boldy», - dep túsindirdi vedomstvodan.
Jeńimpazdar jas erekshelikterine qaraı aqshalaı syılyq jáne arnaıy dıplomdarmen marapattaldy. Onyń ishinde «Eń jas qatysýshy» atalymy boıynsha 8 jasar Dalı Dýdarkıeva, «Sport ardageri» atalymy boıynsha 70 jastaǵy Anatolıı Gýbko jáne «Jeńiske degen jigeri úshin» atalymy boıynsha 8 jasar Nıkıta Kolpakov (8 let) marapatqa ıe boldy.
«Buqpa taýynyń tóbesine shyǵý búgingi jarys qatysýshylarynyń bárin tolǵandyrǵany anyq. Men kásibı sportshy bolmasam da, densaýlyq úshin keshkilik júgirip turamyn. Jarys qatysýshylardyń qyzyǵýshylyǵyn oıatyp, buqaralyq sportpen shuǵyldanýǵa septigin tıgizetini sózsiz», - deıdi Kókshetaý qalasynyń turǵyny Dınara Esenbaeva.
Aıta keteıik, «Baspaldaq» júgirý jarysy alǵash ret 1991 jyly uıymdastyrylǵan. Ýaqyt óte eskerýsiz qalsa, 2006 jyldan bastap Aqmola oblysy dene shynyqtyrý jáne sport basqarmasynyń bastamasymen jyl saıyn ótkiziletin boldy. Al, 2009 jyldan beri «Baspaldaq» halyqaralyq marafondar qatysýshysy, QR sport qaıratkeri Ibragım Tıagalıevtiń qurmetine arnalyp uıymdastyrylyp keledi.
