Kókshetaýda ótken alaman báıgede elordalyq shabandoz 3 mln teńge ıelendi
KÓKShETAÝ. QazAqparat - Aqmola oblysynda báıge maýsymy ashyldy, dep habarlaıdy QazAqparat tilshisi.
Aqmola oblysynyń dene shynyqtyrý jáne sport basqarmasynyń málimetinshe, Kókshetaý qalasynyń irgesindegi Krasnoıar kentinde ornalasqan "Qulager" atshabarynda ótken maýsymnyń ashylýyna Nur-Sultan qalasy men Aqmola, Qaraǵandy jáne Soltústik Qazaqstan oblystarynan ákelingen 30 sáıgúlik qatystyryldy. Jarys jeńimpazdary 1800 (3 jastaǵy tulparlar), 2000 (3 jastan joǵary), 5000 (qunan báıge) jáne 16000 metr (alaman báıge) qashyqtyqtar boıynsha anyqtaldy.
"Jarys qorytyndysy boıynsha 1800 metr qashyqtyqta Krasnoıar aýylynyń shabandozy Rýmııa Ýsmanovanyń júırigi jeńiske jetse, 5 000 metrden elordalyq Jumanazar Nurdáýlettiń, 2000 metrde sandyqtaýlyq Azamat Qultasovtyń tulpary top jardy. Al, 16000 metr alaman báıgede Nur-Sultan qalasynan kelgen Amangeldi Raıymbektiń sáıgúligi márege birinshi bolyp kelip, 3 mıllıon teńgeniń bas júldesin jeńip aldy", - deıdi vedomstvonyń baspasóz hatshysy Mahabbat Bolshına.
