Kókshetaýda ótetin mýzeı festıvalinde álemdik deńgeıdegi mýzykanttar men folklorlyq ansamblder óner kórsetedi
KÓKShETAÝ. QazAqparat - Maýsymnyń 13-i kúni Kókshetaýda Qazaq handyǵynyń 550 jyldyǵyna arnalǵan «Qazaq handyǵyna 550 jyl» atty óńiraralyq mýzeı festıvali ótedi.
Bul týraly búgin Aqmola oblysy mádenıet basqarmasynyń basshysy Sáýle Bóribaevanyń qatysýymen ótken baspasóz máslıhatynda aıtyldy. Basqarma basshysynyń aıtýynsha, festıval Qazaq memleketiniń tarıhnamasy men Qazaq handyǵynyń tarıhy máseleleriniń ózektiligi, Qazaqstan Respýblıkasynyń tarıhı-mádenı murasyn nasıhattaý, qazaq halqynyń ulttyq tarıhyn keńeıtý, halyqaralyq mýzeılik dıalogty damytý men jańashyl kezeńdegi mýzeılerdiń ǵylymı qyzmettik salasyn keńeıtý maqsatynda qolǵa alynyp otyr. «Aǵymdaǵy jyldyń 13 maýsym kúni QR Mádenıet jáne sport mınıstrliginiń qoldaýymen ótetin Qazaq handyǵynyń 550 jyldyǵyna arnalǵan óńiraralyq mýzeıfestıvaliniń shymyldyǵy Sh.Qusaıynov atyndaǵy qazaq mýzykalyq-drama teatrynda ashylmaq. Oǵan Italııanyń Bolon ýnıversıtetiniń professory Jan Lýka Bonora, Vengrııadaǵy «Madjar-Týran» halyqaralyq qordyń jetekshisi, jaratylystaný mýzeıiniń dırektory Bıro Andrash Jolt, respýblıkalyq jáne aımaqtyq mýzeıleriniń ǵylymı qyzmetkerleri, Qazaqstan men Reseıdiń ǵalymdary men tarıhshylary, Reseı, Eýropa jáne Azııa qarý-jaraq jınaǵy men zattary boıynsha Reseı Federatsııasynyń Mádenıet mınıstrliginiń sarapshysy Alekseı Pastýhov, Novosıbırsk memlekettik ýnıversıtetiniń tarıh ǵylymdarynyń doktory, arheologııa jáne etnologııa kafedrasynyń professory Leonıd Bobrov sııaqty sheteldik ǵalymdar qatysatyn bolady.
Atalǵan festıval baǵdarlamasyna sáıkes «Mýzeılik rarıtetterindegi Qazaq handyǵynyń tarıhy» ǵylymı-praktıkalyq konferentsııa,«Qazyna - Prezent» mýltımedııalyq mýzeı jobalarynyń tusaýkeseri, oblystyq tarıhı-ólketaný mýzeıiniń zaldary boıynsha teatrlandyrylǵan ekskýrsııa uıymdastyrylmaq. Sonymen qatar, festıval qatysýshylary men qonaqtaryna Sh.Qusaıynov atyndaǵy qazaq mýzykalyq-drama teatry aldyndaǵy alleıada Kókshetaý qalasy men oblystyń áróńirinen kelgen 90-ǵa jýyq sándik-qoldanbaly óner sheberleriniń «Óner - Fest» kórme-jármeńkesi usynylady.
Sondaı-aq, qonaqtar úshin Şýche- Býrabaı kýrorttyq aımaǵyna arnaıy saıahat uıymdastyrý da josparda bar. Al, keshki 17.00-de Aqmola oblystyq fılarmonııa ǵımaratynda Qazaq handyǵynyń 550 jyldyǵyna arnalǵan «Ǵasyrlar úni» folklorlyq-etnografııalyq festıvali ótedi.
Oǵan Qazaqstan, Reseı, Belarýs, Qytaı, Mońǵolııa, Bashqurtstan, Altaı Respýblıkasynan kelgen álemdik deńgeıdegi mýzykanttar men folklorlyq ansamblder qatysady.
«Ǵasyrlar úni»folklorlyq-etnografııalyq festıvali ártúrli ulttardyń basyn biriktire otyra, ózara mádenı almasýdyń kólemin ulǵaıtýǵa, tyǵyz shyǵarmashylyq baılanys ornatýǵa yqpal etedi, sonymen qatar qazaq, orys, belarýs, qytaı, mońǵol halyqtarynyń baǵa jetpes qundylyqtaryn qoǵam nazaryna usynyp, kórermen halyqtyń qyzyǵýshylyǵyn týǵyzady degen senim bar», - deıdi Sáýle Bóribaeva.
