Kókshetaýda orys, slavıan jáne kazak ánderi shyrqaldy
Úkili Ybyraı atyndaǵy Aqmola oblystyq fılarmonııasynda ótken sharaǵa oblystyń ár óńirinen 150 astam adam qatysty. Shara Aqmola oblysynyń ishki saıasat basqarmasy, Qazaqstan halqy Aqmola assambleıasy, «Qoǵamdyq kelisim» mekemesiniń qoldaýymen «QR orys, slavıan jáne kazak uıymdarynyń qaýymdastyǵy» zańdy tulǵalar birlestigi Aqmola oblystyq fılıalynyń uıymdastyrýymen ótti.
QR Parlamenti Májilisi Tóraǵasynyń orynbasary Vladımır Bojko, Aqmola oblysy ákiminiń orynbasary Aına Mysyrálimova festıval qatysýshylary men kórermenderiniń aldynda sóılegen sózinde elimizdiń sátti ári qarqyndy damýynda Ult Kóshbasshysynyń atqarǵan róli erekshe ekenin atap ótti.
«Qazaqstandyq memlekettiliktiń qalyptasýy Nursultan Nazarbaevtyń esimimen tikeleı baılanysty. Elimiz Táýelsizdik alǵan 27 jyldyń ishindegi biregeı damý úlgisiniń arqasynda osyndaı is-sharalardy ótkizýge múmkindik týǵanyn árbir azamat sezinýi tıis», - dep atap ótti Aına Mysyrálimova.
Kesh barysynda «Chernoglazaıa kazachka» jáne «Kak za Donom, za rekoı» ánderin oryndaǵan Qaraǵandy qalasynan kelgen «Kazachıa volnıtsa» ansambli birinshi, Şýchelik «Kazachıı stan» dýeti ekinshi, «Lıýbo mne, kogda Don razlıvaetsıa» jáne «Chernyı voron» ánderin oryndaǵan Kókshetaýlyq «Hýtorok» toby úshinshi orynǵa ıe bolyp, kópshilik qaýymynyń qoshemetine bólendi.
Sonymen qatar, Tselınograd aýdanyndaǵy «Malınovka» orys halyqtyq hory, Bulandy aýdanyndaǵy «Blagovest» kazak halyqtyq hory, Temirtaýlyq «Kalınka» ansambli, Arshaly aýdanyndaǵy Vasılıı Zelenyı halyqtyq ansambli, Petrpavl qalasynan kelgen «Dacha» trıosy, Aqmola oblysy tatar jáne bashqur birlestiginiń «Galııabaný» folkroly ansambliniń ánshileri jan-tánimen, aıryqsha sheberlikpen oryndaǵan ánderi kórermenderdiń kóńilinen shyqty.
Al, Kókshetaýdaǵy «Qoǵamdyq kelisim» mekemesiniń vokaldy stýdııasynyń vokalısteri Sáýle Laýbaeva, Anastasııa Ýshakova jáne «Dala ólkesiniń kazaktar odaǵy» aýdandyq qoǵamdyq birlestigi Şýche fılıalynyń vokalısti Vıktor Ovsıannıkov úzdik atandy.
Festıvalge Dala ólkesiniń kazaktar odaǵynyń atamany Nıkolaı Kovalenko, QR eńbegi sińgeni ártisi Bısara Mákenova, Aqmola oblystyq fılarmonııasynyń kontsertmeıster Galına Kolesnıkova sııaqty tanymal óner adamdary tórelik etti.
Festıvalge qurmetti qonaq retinde qatysqan «Qazaqstannyń orys, slavıan jáne kazaktar qaýymdastyǵy uıymynyń» tóraǵasy Vladımır Bojko jınalǵandardy quttyqtaı, kele, jeńimpazdardy baǵaly syılyq jáne arnaıy dıplomdarmen marapattady.
