Kókshetaýda órtengen avtobýsta 25 adam bolǵany anyqtaldy
KÓKShETAÝ. QazAqparat - Kókshetaýda órtengen avtobýsta 25 adam bolǵany anyqtaldy. Olardyń barlyǵy "Kókshe tsement" AQ jumysshylary men jolaýshylar, dep habarlaıdy QazAqparat HAA tilshisi ІІD baspasóz qyzmetine silteme jasap.
Vedomstvonyń baspasóz qyzmetiniń málimeti boıynsha oqıǵa túngi saǵat 23:00-den asa oryn alǵan.
"Avtobýs "Kókshe tsement" AQ tıesili. Qoǵamdyq kóliktiń ishinde 25 adam boldy. Olar Birjan sal aýdanyndaǵy Zaozernoe aýylyndaǵy kirpish zaýytynan vahtadan úılerine kele jatqan jumysshylar men jolaýshylar. Zardap shekkender joq. Kóliktiń ishinde bolǵandardyń barlyǵy qutqaryldy. Qutqarý jumystaryna jol patrýldik polıtsııasy batalonynyń qyzmetkerleri atsalysty", dep túsindirdi ІІD baspasóz hatshysy G.Pınchýk.
Qazirgi kezde, osy oqıǵaǵa baılanysty tekseris júrgizilýde.
Eske sala keteıik, osyǵan deıin habarlaǵanymyzdaı avtobýstyń órtenip jatqandyǵy týraly jergilikti əleýmettik jelide beınejazba taraǵan bolatyn.
Foto: bjornsramblings.blogspot.ru
