Kókshetaýda órt sóndirýshiler aýrýhanada jatqan balalardy Jańa jylmen quttyqtady

KÓKShETAÝ. QazAqparat - Kókshetaýda órt sóndirýshiler oblystyq balalar aýrýhanasynda jatqan balalardy kele jatqan Jańa jylmen quttyqtady, dep habarlaıdy QazAqparat Aqmola oblysy TJD-nyń baspasóz qyzmetine silteme jasap.

«Ár bala Aıaz atanyń qolynan syılyq alýdy armandaıdy. Alaıda, mundaı múmkindik barshasynda bola bermeıdi. Ókinishke oraı, Aqmola oblysynyń keıbir kishkentaı turǵyndary merekeni aýrýhanalarda qarsy alýǵa májbúr. Balalardyń kóńil-kúıin kóterý úshin TJD qyzmetkerleri oblystyq balalar aýrýhanasynyń patsıentterine ertegi keıipkerleriniń kostıýmderimen keldi», delingen habarlamada.

Aıaz ata men Aqshaqar úshinshi qabatqa avtosatymen kóterilip, balalarǵa syılyqtaryn tabystaý barysynda tezirek saýyǵyp ketýin tiledi. Іs-shara «Dobroe serdtse» eriktilerimen birge ótti.

«Bireýler Aıaz ata at nemese buǵy minip júredi dep oılaıdy, al búgin bizge onyń órt sóndirý mashınasymen kelgeni erekshe boldy», - deıdi aýrýhana qyzmetkerleri.

Sonymen qatar, órt sóndirýshiler Jańa jyldy qaýipsiz ótkizý maqsatynda oblystyq balalar aýrýhanasynda órt-tehnıkalyq sabaqtaryn ótkizdi.