Kókshetaýda órik, qaýyn jáne qarbyzda nıtrattar shamadan tys kóp bolyp shyqty
KÓKShETAÝ. QazAqparat - Kókshetaýdaǵy saýda oryndarynda satyp jatqan órik, qaýyn jáne qarbyzda nıtrattardyń shamadan tys kóp ekeni anyqtaldy, dep habarlaıdy QazAqpart tilshisi Aqmola oblysynyń qoǵamdyq densaýlyqty qorǵaý departamentine silteme jasap.
Vedomstvonyń deregi boıynsha «Jibek joly» saýda kesheni aýmaǵynda «Qaýipsiz jáne saý ónimdi tańda» atty aktsııa ótkizildi. Oǵan Aqmola oblysynyń qoǵamdyq densaýlyqty qorǵaý departamenti, ulttyq saraptama ortalyǵy jáne Kókshetaý qalalyq qoǵamdyq densaýlyqty qorǵaý basqarmasynyń mamandary tartylyp, tutynýshylarǵa sapaly durys tamaqtanýdy nasıhattaý arqyly, sapaly azyq-túlik ónimin tańdaý jáne azyq-túlikten ýlanýdy aldyn alý boıynsha túsindirý jumystaryn júrgizdi.
«Tutynýshylar satyp alǵan ónimderin sapasy men qaýipsizdigine tegin zertteı aldy. Mamandar ekspress ádisi jáne qazirgi zamanǵy aspaptardyń kómegimen sanaýly mınýttardyń ishinde ónimniń jeýge jaramdy ne jaramsyz ekenin anyqtap berdi», dep túsindirdi vedomstvodan.
Aktsııa kezinde azyq-túlik ónimderiniń sanıtarlyq-hımııalyq kórsetkishterine 120, mıkrobıologııalyqqa 100 jáne parazıtologııalyqqa 100 synama alyndy. Nátıjesinde 18 synamada sanıtarlyq-hımııalyq kórsetkishterge saı kelmegeni anyqtaldy. Sonyń ishinde órikte-12, qaýynda-3 jáne qarbyzda-3 synama.
