Kókshetaýda onomastıka salasyndaǵy máseleler talqylandy
KÓKShETAÝ. QazAqparat - Kókshetaýda «Aqmola, Jambyl oblystarynyń toponımderi» atty respýblıkalyq ǵylymı-praktıkalyq offlaın-onlaın semınary ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.
Sharany Qazaqstan Respýblıkasy Mádenıet mınıstrligi Mádenıet komıteti men «KAINAR» kásibı daıyndyqtyń joǵary mektebi Aqmola oblysy ákimdiginiń qoldaýymen uıymdastyrdy.
Basqarma mamany Ásem Jumaǵulovanyń aıtýynsha, semınarda onomastıka salasyna qatysty birqatar máseleler, atap aıtqanda oblystardaǵy tarıhı ataýlardyń etımologııasyn dıahrondyq ádis turǵysynan zertteýler, naqty dáleldermen tarıhı ataýlardy qalpyna keltirý týraly pikirler aıtyldy.
Semınarǵa Mádenıet komıteti tóraǵasynyń orynbasary K.Seıitova men onomastıka basqarmasynyń basshysy E.Tórehan jáne oblystyń aýdandyq jáne qalalyq mádenıet jáne tilderdi damytý bólimderiniń basshylary men mamandary qatysty.
Atalǵan jıynda onomastıka salasy baǵytynda ǵylymı zertteýlermen aınalysyp júrgen ǵalymdardyń baıandamalary tyńdaldy.
S.Seıfýllın atyndaǵy Qazaq agrotehnıkalyq ýnıversıtetiniń professory, fılologııa ǵylymdarynyń doktory S. Imanberdıeva «Tarıhı-dıahrondyq ádisti qoldaný arqyly onomastıkalyq ataýlardy júıelendirý qyzmeti» jobasy týraly baıandasa, Dýlatı atyndaǵy Taraz óńirlik ýnıversıtetiniń professory, fılologııa ǵylymdarynyń kandıdaty Z.Qulamanova, L.Gýmılev atyndaǵy Eýrazııa ulttyq ýnıversıtetiniń professory, geografııa ǵylymdarynyń doktory Q.Saparov tarıhı toponımder jaıly sóz qozǵady.
«Aqmola oblysynyń toponımderin tarıhı-dıahronııalyq ádisti qoldaný arqyly júıelendirý - óńir toponımderiniń kesteli sózdigin jasaý, onımderdi toptastyrý jáne ýáji, ıaǵnı nomınatıvtik prıntsıpin anyqtaý sııaqty jumystar aıasynda júrgizildi. Jumystyń derekkózderi retinde Aqmola oblysynyń aımaǵyna qatysty 1845 jyldan búgingi kúnge deıingi kartalar Reseı jáne otandyq muraǵattar men ǵylymı-zertteý materıaldary, ǵalymdardyń eńbekteri, kórkem ádebıet mátinderi alyndy» - dep atap ótti G.Bekenova.
Aıta keteıik, buǵan deıin Aqmola oblysy ishki saıasat basqarmasynyń tapsyrmasymen ǵalym J.Artyqbaevtyń «Aqmola oblysynyń toponımıkasyn zertteý jumystary boıysha kitaby jaryq kórdi.
