Kókshetaýda óńirdiń daryndy balalary bas qosty
KÓKShETAÝ. QazAqparat - Aqmola oblysynda daryndy balalardyń forýmy ótti, dep habarlaıdy QazAqparat tilshisi.
Kókshetaýdaǵy IT mektep-lıtseıinde uıymdastyrylǵan sharaǵa oblystyń ári óńirinen 9-11synyp oqýshylarynan quralǵan 240 astam oqýshy jınaldy. Qatysýshylardyń arasynda halyqaralyq, respýblıkalyq, oblystyq olımpıadalar, ǵylymı joba baıqaýlarynyń jeńimpazdary men júldegerleri bar.
«Búgingi forýmǵa oblys mektepteriniń eń úzdik oqýshylary jınalyp otyr. Sizderdeı daryndy, talantty balalar turǵanda elimizdiń keleshegi úshin alańdamaýǵa bolady. Sizderdiń qoǵamdyq mańyzy zor iste joǵary jetistikterge qol jetkizip, ózgelerge jol kórsete alatyndaryńyzǵa senimdimin. Biz sizderge úlken senim artamyz!», - dedi quttyqtaý sózinde oblys ákimi Ermek Marjyqpaev.
Sharada matematıka, hımııa, fızıka, ınformatıka sııaqty pánder boıynsha ıntellektýaldy múmkindikterin pash etken oqýshylarǵa aqshalaı sertıfıkattar tapsyryldy. Osyndaı joǵary marapatqa ıe bolǵandardyń arasynda bilim berý granttarynyń ıegeri bar. Onyń ishinde pán olımpıadasynyń jeńimpazy şýchelik Asqar Nesipbaı men kókshetaýlyq Ermek Ráshıtov Ál-Farabı atyndaǵy Qazaq ulttyq ýnıversıtetine rektordan arnaıy shaqyrtý alyp otyr. Budan bólek, olardyń tálimgerleri de Alǵys hattarmen marapattaldy.
Sonymen qatar, Aqmola oblysyndaǵy mektepterden túlep ushyp, bıik belesterge qol jetkizgender de ózderiniń jetistikteri jaıly aıtyp, tájirıbelerimen bólisti. Olardyń arasynda kóshbasshy kompanııalardyń birinde bas maman bolyp qyzmet istep júrgen Arızon shtatyndaǵy ýnıversıtettiń túlegi Ernar Sámtikov, «100 jańa esim» jobasynyń jeńimpazy, Gonkong ýnıversıtetiniń 3 kýrs stýdenti Almas Eskenov jáne Nıý-Iorktiń kınoóneri akademııasyn támamdaǵan Aıdııa Aıdarbekovtyń baıandamasyn forýmǵa qatysýshylar uıyp tyńdady.
Forým sheńberinde «Nomads Camp» halyqaralyq kıiz úı lageri, Workout qozǵalysy ınstrýktorlarynyń sheberlik synyby ótkizildi, sondaı-aq, oqýshylardyń ІT tehnologııasy, 3D pishindeý, oblystyń kıeli jerlerin úlgileý, gıdroponıka jáne robototehnıka salasyndaǵy jetistikteriniń kórmesi uıymdastyryldy.
Aıta ketý kerek, Aqmola oblysynda 120 myńnan astam oqýshy orta bilimmen qamtylǵan. Bıylǵy oqý jylynda 73 myńnan astam oqýshynyń sabaq úlgerimi «úzdik» jáne «jaqsy» dep baǵalandy. 4600 túlektiń 240-i «Altyn belgi», 169-y úzdik attestat ıegeri.
