Kókshetaýda óltirilgen polıtseıdiń mańyzdy tergeý qujattary órtelgeni anyqtaldy
ASTANA. QazAqparat - Kókshetaýda áriptesiniń qolynan aıýandyqpen ólgen polıtseı Darhan Elamanov jer qoınyna berildi.
Al qaıǵydan qan jutqan aǵaıyn-týys tergeýshilerdiń dáıegine múldem senbeı otyr, dep habarlaıdy «KTK» arnasy.
Buǵan deıin qandy qylmysqa ekeýara kelispeýshilik sebep bolǵany aıtylǵan. Sebebi leıtenanttyń qolynda mańyzdy tergeý qujattary bolǵan eken. «Sonyń kózin qurtý úshin istelgen áreket», deıdi Elamanovtyń jaqyndary.
Darhan Elamanovty kúlli Krasnyı ıAr aýyly joqtap jatyr. Asqan qatygezdikpen óltirilgen áriptesin sońǵy saparǵa shyǵaryp salýǵa oblystyq Іshki ister departamentiniń basshylaryna deıin kelgen.
25 jeltoqsan kúni Elamanov kezekshilikten shyqqan soń, izim qaıym joǵalyp ketken edi. Keıin Darhandy jabylyp izdegen jaqyndary eki kúnnen keıin óli denesin qala shetindegi Kenesary aýylynyń mańynan tapqan. Kúdiktini ustaý úshin polıtseıler marqumnyń uıaly telefonyn tekserip, sońǵy ret kimdermen sóıleskenin anyqtady. Sóıtip, Elamanovty óziniń áriptesi, 32 jastaǵy maıor Jánibek Baımurzın basynan atyp óltirip, qarǵa kómip ketkeni belgili bolyp otyr.
«Ony úıinen ustaǵan. Qysymǵa alǵan soń aıta bastaǵan. Tergeý kezinde odan Darhannyń neke júzigin, qyzmettik tapanshasyn, qujattaryn tapqan. Keıin máıittiń qaıda ekenin aıtyp beripti», - deıdimarqumnyń aǵasy Nurbek Elamanov.
Kúdikti qylmysyn jasyrý úshin máıitti Kókshetaýdan 40 shaqyrym jerge kómgen. Marqumnyń jaqyndary máıit tabylǵan jerde bir emes birneshe aıaq izderiniń bolǵanyn aıtady.
«Soǵan qaraǵanda Jánibek Baımurzın jalǵyz bolmaǵan syńaıly. Qazir maıor qamaýǵa alynyp, birneshe saraptama taǵaıyndalǵan. Ázirge, qylmys ekeýara kelispeýshilikten bolǵan degen boljamdar aıtylýda. Biraq, marqum aǵa leıtenanttyń jaqyndary buǵan senbeıdi. «Qylmys bolǵan jerde Darhan Elamanov júrgizgen mańyzdy tergeý qujattary órtelgen», deıdi olar. Sondyqtan istiń aq-qarasyn anyqtap, kináli qatań jazalansyn dep otyr. Al,3 aı buryn ǵana shańyraq kótergen 27 jastaǵy marqumnyń artynda aıaǵy aýyr áıeli qaldy», - dep habarlady telearna.
Eske salsaq, Aqmola oblysy boıynsha ІІD qyzmetkerleri shuǵyl-izdestirý sharalary barysynda 2016 jyldyń 25 jeltoqsanynda joǵalǵan polıtsııa aǵa leıtenanty D.M.Elamanovty óltirdi degen kúdikpen polıtsııa qyzmetkerin ustaǵan bolatyn.
