Kókshetaýda óltirilgen polıtseıdiń ákesi Májilis depýtattarynan kómek surady
KÓKShETAÝ. QazAqparat - Kókshetaýda óltirilgen polıtseıdiń ákesi Murat Elamanov májilis depýtattarynan kómek surady, dep habarlaıdy «Qazaqparat» HAA tilshisi.
Aqmola oblysyna jumys saparymen kelgen QR Parlamenti Májilisiniń depýtattary Janat Jarasov pen Ersultan Bekturǵanov Kókshetaý qalasynyń irgesindegi Krasnyı ıar aýylynda bolyp,birqatar áleýmettik-óndiristik nysandardyń jumysymen tanysty. Keıin qoǵamdyq qabyldaý ótkizip, muń-muqtajymen kelgen jergilikti turǵyndardyń saýaldaryna qulaq túrdi.
Halyq qalaýlylarynyń qabyldaýyna kelgenderdiń arasynda jaqynda ǵana áriptesiniń qolynan qaza tapqan Kókshetaý qalalyq ІІB-niń polıtsııa leıtenanty bolyp qyzmet istegen Darhan Elamanovtyń ákesi Murat Elamanov ta bar. Marqumnyń ákesi balasynyń ólimine qatysty istiń aq-qarasy anyqtalyp, kináli qatań jazalansyn dep otyr. Onyń aıtýynsha, Darhandy qatygezdikpen óltirgen kúdiktiniń týystary organdarda qyzmet istegendikten is burmalanyp, aıypty jeńil jazamen qutylýy ábden múmkin.
«Balamnyń ólimine qatysty túrli jańsaq pikirler aıtylýda. Balamdy óltirgen adamnyń jaqyn týystary organdarda qyzmet isteıdi. Sondyqtan, olardyń yqpalymen erteń meniń balam kináli bolyp, qylmysker jeńil jazamen qutyla ma dep qorqamyn», dedi Murat Elamanov.
Alaıda, qabyldaýǵa arnaıy qatysqan oblystyq ІІD basshysynyń orynbasary Erbol Júsipov qazirgi kezde tergeý amaldary júrgizilip jatqandyqtan atalǵan iske qatysty eshqandaı da bir málimet bere almaıtynyn aıtty. Degenmen, departament basshysynyń orynbasary kúdiktiniń týystary organdarda laýazymdy qyzmetterde otyrǵanyn jasyrmady. 
«Bul is QR Іshki ister mınıstriniń jiti baqylaýynda, qazirgi kezde tergeý amaldary qolǵa alynyp, aıypty tergelýde. Sondyqtan, tolyq málimetti tergeý amaldary aıaqtalǵan soń ǵana jarııalaı alamyz», dep túsindirdi E.Júsipov.
Eske sala keteıik, 25 jeltoqsan kúni Darhan Elamanov kezekshilikten shyqqan soń, iz-tússiz joǵalyp ketken edi . Keıin Darhandy jabylyp izdegen jaqyndary eki kúnnen keıin óli denesin qala shetindegi Kenesary aýylynyń mańynan tapqan. Kúdiktini ustaý úshin polıtseıler marqumnyń uıaly telefonyn tekserip, sońǵy ret kimdermen sóıleskenin anyqtady. Sóıtip, Elamanovty óziniń áriptesi, 32 jastaǵy maıor Jánibek Baımurzın óltirdi dep kúdiktelip otyr . 
