Kókshetaýda adam ólimine ákelgen jol apaty boıynsha sheshim shyqty
ASTANA. KAZINFORM — Sot úkim shyǵarý kezinde keltirilgen zııannyń ótelýin jáne barlyq jábirlenýshiniń pikirin eskerdi, dep habarlaıdy Kazinform agenttiginiń tilshisi.
24 jastaǵy aıyptalýshyǵa eki adamnyń densaýlyǵyna abaısyzda zııan keltirý jáne bir adamnyń ólimine ákep soqtyrǵan jol qozǵalysy erejelerin buzý aıyby taǵyldy. Sotta oqıǵanyń mán-jaıy aıtyldy.
— 2025 jyldyń naýryz aıynda Kókshetaý qalasynda qarbalas kóshede Mercedes markaly avtokólikti tizgindegen A. esimdi azamat saǵatyna 60 kılometrden astam jyldamdyqpen kele jatqan. Ol jyldamdyqty tómendetý nemese kólikti toqtatý sharalaryn qabyldamaı, qarsy baǵyttaǵy kólikti ótkizbeı, qıylysta burylyp kele jatqan «VAZ» avtokóligimen soqtyǵysqan. Jol-kólik oqıǵasynyń saldarynan soqqy áserinen A.-nyń kóligi trotýarǵa ushyp ketip, ol jerde jaıaý júrginshini qaǵyp ketken. Ol alǵan jaraqattarynan kóz jumdy, — delingen sot habarlamasynda.
«VAZ» avtokóligindegi eki jolaýshy ortasha jáne aýyr dene jaraqatyn alǵan. Zardap shekkender aýrýhanaǵa jatqyzyldy, al «VAZ» júrgizýshisi jaraqat alǵan.
Aıyptalýshy óz kinásin moıyndap, «júrek ótkizgishtiginiń buzylýy: sýbklınıkalyq gıpotıreoz. Uıqynyń obstrýktıvti apnoe sındromy» dıagnozy boıynsha esepte turǵany týraly anyqtama usyndy. Ol jábirlenýshilerge moraldyq jáne materıaldyq zııandy ótegenin eskerip, bas bostandyǵynan aıyrmaýdy suraǵan.
Jábirlenýshiler men qaıtys bolǵan áıeldiń qyzy da aıyptalýshyny bas bostandyǵynan aıyrmaýdy ótingen.
Jaza taǵaıyndaý kezinde sot medıatsııa kelisiminiń jasalǵanyn, ıaǵnı jábirlenýshilermen jáne qaıtys bolǵan adamnyń týystarymen tatýlasýdy, sondaı-aq barlyq jábirlenýshilerge jalpy somasy 11,5 mln teńge kóleminde materıaldyq jáne moraldyq zııannyń erikti túrde ótelgenin eskerdi. Sondaı-aq sýdıa barlyq jábirlenýshilerdiń sottalýshyny bas bostandyǵynan aıyrmaý jáne jeńil jaza taǵaıyndaý týraly pikirin nazarǵa aldy.
— Sot úkimimen A. esimdi azamatqa 2,5 jyl bas bostandyǵynan aıyrý jazasy shartty túrde taǵaıyndaldy, sondaı-aq 5 jyl merzimge kólik quraldaryn basqarý quqyǵynan aıyryldy. Belgilengen merzim boıy probatsııalyq baqylaý ornatylyp, sottalǵanǵa mindetter júkteldi, — dep qorytyndylady sotta.
Aıta keteıik, sot sheshimi zańdy kúshine engen joq.
Budan buryn Kókshetaýda kóliktiń áıeldi qaǵyp óltirgen vıdeosy taraǵanyn jazǵanbyz.
Belgili bolǵandaı, er adam kólikti júrgizýshi kýáligi joq jubaıyna bergen.
Endi ekeýine qatysty qylmystyq is qozǵalǵany anyqtaldy.
