Kókshetaýda oqýshy psıhotropty dárilerdi jasyrýmen aınalysqan

KÓKShETAÝ. QazAqparat - Kókshetaýda esirtki qylmysyna qarsy kúres bólimsheleriniń qyzmetkerleri júrgizgen arnaıy operatsııa barysynda dárilik zattardy jasyryp kelgen bes adam ustaldy. Olardan 770 tabletka «Tramadol», 15 flakon «Protekamın» jáne 30 flakon «Tropıkamıd» tárkilendi, dep habarlaıdy QazAqparat tilshisi.

Aqmola oblystyq polıtsııa departamenti baspasóz qyzmetiniń málimetinshe, ustalǵan adamdardyń arasynda 22 jastaǵy áıel de bar.

Ol MPS kóshesi men vokzaly aýmaǵynda dárilik preparattardy jasyryp kelgen. Onyń qaltasyn tekserý barysynda 180 tabletka «Tramadol» tabyldy.

Sonymen birge, PD Esirtki qylmysyna qarsy kúres basqarmasynyń qyzmetkerleri 30 jastaǵy kókshetaýlyqtan 280 dana «Tramadol» jáne 15 flakon «Protekamın» tárkiledi. Er adam Áshimov kóshesiniń boıyndaǵy úıiniń aýlasynda ustaldy.

Al, Sádýaqasov kóshesiniń boıynda 27 jastaǵy er adamnan polıetılen oramaǵa salynǵan sur-jasyl tústi zat alynyp, saraptamaǵa jiberildi.

Er adam probatsııalyq qyzmettiń baqylaýynda tur. Baqylaý brasleti oǵan esirtki zattaryn jasyrýmen aınalysýǵa kedergi bolmaǵan.

Túngi saǵat 01:00 shamasynda avtovokzal mańynda eki jas jigit ustaldy.

Onyń biri - kámelet jasyna tolmaǵan jasóspirim.

Olardy polıtsııa ýchaskesine jetkizip, zattaryn tekserý kezinde 22 jastaǵy er adamnyń sómkesinen «Tramadol» preparatynyń 1 blısteri tárkilendi.

Er adam polıtsııa ustaǵan kezde birden kúdik týǵyzǵan.

Sol kúni túngi saǵat 03:07 shamasynda oblys ortalyǵynyń Ýálıhanov kóshesiniń boıynda 28 jastaǵy jergilikti turǵyn basqarǵan avtokólik toqtatyldy.

Er adamnyń astanadan iri kólemde «Tramadol» dárilik preparattaryn ákele jatqandyǵy anyqtaldy.

Kólik salonynan 30 plastın «Tramadol» jáne 30 flakon «Tropıkamıd» preparattary tárkilendi.

«Barlyq jaǵdaı boıynsha Qylmystyq kodekstiń 296 babynyń 2 jáne 3 bóligi boıynsha «psıhotropty zattardyń zańsyz aınalymy» sotqa deıindig tergeý amaldary qolǵa alyndy. Tárkilengen zattar saraptamaǵa jiberildi», - dedi vedomstvodan.