Kókshetaýda neke saraıy paıdalanýǵa berildi
KÓKShETAÝ. QazAqparat-Kókshetaýda Aqmola oblys ákimi Málik Myrzalınniń qatysýymen oblys ortalyǵynda shyǵys sáýlet óneriniń klassıkalyq úlgisimen salynǵan jańa «NEKE Sarai ý» neke saraıy paıdalanýǵa berildi, dep habarlaıdy QazAqparat tilshisi.
Qos qabatty ǵımarattyń qurylysyn bas merdiger «Aq sáýle» jaýapkershiligi shekteýli seriktestigi júrgizgen. Ǵımarat alyp kıiz úı úlgisinde salynǵan. Sáýleti kelisken, qazirgi zaman talabyna saı mundaı ǵımarattar respýblıkanyń birqatar oblys ortalyqtarynda ǵana kezdesedi. Birinshi jáne ekinshi qabattar bólinbeıdi, ıaǵnı bári bir shańyraq astynda.
Ǵımarattyń jalpy aýdany 1797,1 sharshy metrdi quraıdy. Nysannyń astyńǵy bóliginde kireberis zal, kıim iletin oryn, azamattyq hal aktilerin tirkeý jumys keńsesi, qonaqtarǵa arnalǵan bólme, kúıeý jigit pen qalyńdyqty saltanatty rásimge daıyndaıtyn bólmeler, qyzmetshilerdiń kabınetteri ornalasqan. Saltanat zalynan bólek úsh holl, kassa, foto, býhgalterııa bólmeleri bar. Jańadan eńse tiktegen Neke qııý saraıynda azamattyq hal aktilerin jazý bólimi qyzmeti úshin barlyq jaǵdaı jasalynǵan.
Nysannyń ashylý saltanatyna qatysqan oblys ákimi qoǵamnyń uıasy - otbasyn qurýdaǵy alǵashqy qadam nekeni saltanatty tirkeýden bastalatynyn atap ótti.
«Elimizde jyl saıyn Táýelsizdik merekesi kúni áleýmettik-óndiristik nysandardy paıdalanýǵa berý dástúrge aınalǵan. Bizdiń oblysymyzda da jańadan turǵyzylǵan, zamanaýı, kelisti de kelbetti turǵyn úıler men óndiris nysandary kóptep berilýde. Búgin ózderińiz kýá bolyp otyrǵandaı saltanat saraıyn ashyp otyrmyz», - dedi Málik Myrzalın quttyqtaý sózinde.
Saltanatty shara barysynda oblys ákimi osy saraıdyń tabaldyryǵyn alǵash attaǵan segiz juptyń neke qııý rásimine kýá bolyp, jas otbasylardy qýanyshtarymen quttyqtady.
