Kókshetaýda Naýryz merekesine oraılastyrylǵan azyq-túlik ónimderiniń jármeńkesi ótip jatyr
KÓKShETAÝ. QazAqparat - Kókshetaýdaǵy Táýelsizdik alańy men «Altyn ǵasyr» saýda úıiniń aldynda Naýryz merekesine oraılastyrylǵan arzan azyq-túlik ónimderiniń jármeńkesi ótip jatyr, dep habarlaıdy «QazAqparat» HAA tilshisi.
Jármeńkege Aqkól, Atbasar, Eńbekshilder, Sandyqtaý aýdandary jáne oblys ortalyǵy aýylsharýashylyǵy taýarlaryn óndirýshiler qatysýda.
Oblystyq aýyl sharýashylyǵy basqarmasynyń málimeti boıynsha, bul joly jármeńkege 55 túrli azyq-túlik ákelinipti. Olardyń jalpy quny - 94,6 mıllıon teńge bolady. Onyń ishinde 49,7 tonnaǵa jýyq et pen shujyq, 7 tonna balyq, 216,5 myń dana jumyrtqa, 20 tonna un men makaron, 19 tonna kartop, 14 tonna kókónis, 5 tonna qant, 12,2 myń lıtr kúnbaǵys maıy, 12,5 tonnadan astam sút jáne ózge de aýyl sharýashylyǵy ónimderi jetkizilgen. Jármeńkede usynylǵan azyq-túlik baǵasy qala bazarlary jáne dúkenderimen salystyrǵanda 15-20 paıyz arzanǵa satylýda.
Jármeńkeni aralap kórgen Aqmola oblysy ákiminiń orynbasary Egor Kappel azyq-túlik baǵasy men sapasyna nazar aýdardy. Sondaı-aq, osyndaı jármeńkeniń dástúr boıynsha aldaǵy ýaqytta da uıymdastyrylyp otyratynyn atap ótti.
