Kókshetaýda naýqas balalardy emdetý úshin aktsııa ótti

KÓKShETAÝ. QazAqparat - Kókshetaýdaǵy naýqas eki balany emdetý úshin Qazaqstan halqynyń Aqmola assambleıasy «Jaqsylyq jasa» qaıyrymdylyq aktsııasyn uıymdastyryp, odan 700 myń teńgeden astam aqsha jınaldy, dep habarlaıdy QazAqparat tilshisi QHAA baspasóz qyzmetine silteme jasap.

Uıymdastyrýshylardyń aıtýynsha, «Jaqsylyq jasa» qaıyrymdylyq aktsııasy 4 jastaǵy Danııal Aıǵoja jəne 5 jasar Dastan Nyǵmetjanovty emdetýge aqsha jınaý úshin uıymdastyryldy. Oǵan Qazaqstan halqynyń  Aqmola assambleıasy janyndaǵy Analar keńesi uıytqy boldy.

«Qaıyrymdylyq aktsııasyna júregi jomart, qaıyrymdy jandar qatysty»-, dep atap ótti Aqmola assambleıasy janyndaǵy Analar keńesiniń tóraıymy Zere Qıyqova.

Qatysýshylardyń arasynda Aqmola oblysyndaǵy etnomədenı birlestikterdiń, bıznes qurylymdardyń ókilderi jəne 9 ulttan 39  bala tərbıelep otyrǵan «Aıala» QB tóraǵasy Serik Əkimbaev boldy.

Aktsııada jınalǵan qarajat eki balanyń anasyna teń bólinip berildi.